வல்லிக்கண்ணனும் , அவ்வை.டி.கே.சண்முகமும் ...

( யுகமாயினி இதழில் தி.க.சி எழுதிய தொடரின் ஒன்பதாம் பாகம் )

வல்லிக்கண்ணனுக்கும் - அவ்வை.டி.கே.சண்முகத்திற்கும் இடையிலான நட்புறவு , பல சுவையான தகவல்களையும் , திருப்பங்களையும் கொண்டது . அவற்றில் ஒரு சிலவற்றை மட்டும் இங்கே கூறுகிறேன்.

1942-ஆம் ஆண்டு துவக்கத்தில் ஒரு முழு நேர எழுத்தாளனாக வாழ வேண்டும் என்ற கொள்கையை உறுதியாக பற்றி நின்ற வல்லிக்கண்ணன் , குடும்பத்தில் ஏற்பட்ட நிரந்தரமான பொருளாதார நெருக்கடி , அவற்றிலிருந்து மீளும் வழிகள் இவை குறித்தும் ஆழமாக சிந்தித்தார் . அவருக்கு அப்போது வாழ்க்கை ஒரு பெரும் போராட்டமாகவே இருந்தது . எனவே இந்த வாழ்க்கைச் சிக்கலிலிருந்து மீள்வதற்காக பல வழிகளில் அவர் முயன்றார் . ' தனக்கு வேலை கிடைக்குமா ... ' எனக் கேட்டு , பத்திரிக்கை ஆசிரியர்களுக்கும் , கலைஞர்களுக்கும் தொடர்ந்து அவர் கடிதங்கள் அனுப்பி வந்தார். இந்த எண்ணத்தில் தான் , அப்போது தமிழகத்தில் மிகப் பிரபலமாக இருந்த டி.கே.எஸ் நாடக சபாவின் தலைவரான டி.கே.சண்முகத்திற்கும் ஒரு மடல் எழுதினார் . இந்நாடக சபாவை டி.கே.சங்கரன் , டி.கே.முத்துசாமி , டி.கே.சண்முகம் , டி.கே.பகவதி ஆகிய நான்குச் சகோதரர்கள் மிகுந்த ஒற்றுமையுடன் நடத்தி வந்தார்கள். இந்நால்வரும் நாடகக்கலை மேதை சங்கரதாஸ் சுவாமிகளின் சீடர்கள் ; தத்துபுத்திரர்கள் போல வளர்க்கப்பட்டவர்கள் .

அந்தக் காலத்தில் ' பாய்ஸ் கம்பெனி ' என்ற பெயரில் தான் , நிறைய நாடகக் கம்பெனிகள் தமிழகத்தில் இயங்கி வந்தன . அவற்றில் , சங்கரதாஸ் சுவாமிகளின் பராமரிப்பில் வளர்ந்து வந்த இந்நால்வரின் பாய்ஸ் கம்பெனியும் ஒன்று . சங்கரதாஸ் சுவாமிகளின் மறைவிற்கு பின்னர் , அவரது மரபைப் பின்பற்றி வந்த இச்சகோதரர்கள் புராண நாடகங்களுடன் , காலத்தின் தேவைக்கேற்ப சமூக நாடகங்களையும் தமிழகத்தின் முக்கிய நகரங்களிலும் , பாலக்காடு போன்ற கேரளத்தின் தமிழ்ப் பகுதிகளிலும் அரங்கேற்றி வந்தனர் . 1930 - ஆம் ஆண்டுகளின் தொடக்கத்தில் வடுவூர் துரைசாமி ஐயங்காரின் ' மேனகா ' எனும் நாவலை நாடகமாக்கி இவர்கள் நடித்தனர் . 1935-இல் அந்நாடகம் இயக்குநர் ராஜா சாண்டோ இயக்கத்தில் ' மேனகா ' என்ற பெயரில் திரைப்படமாகவும் வெளிவந்து மக்களிடையே அதீத வரவேற்பைப் பெற்றது . நாடகச் சகோதரர்கள் நால்வரும் பங்களித்திருந்த இத்திரைப்படத்தில் , இரண்டாவது சகோதரர் டி.கே.முத்துசாமி பெண் வேடமேற்று நடித்தது குறிப்பிடத்தக்கது . 1935-க்குப் பிறகு பற்பல பொருளாதார நெருக்கடிகளிலிருந்து மீண்டு ' டி.கே.எஸ் நாடக சபா ' சற்று வளர்ந்திருந்தது . பத்திரிக்கைகள் மட்டுமன்றி , பொதுமக்களிடமிருந்தும் இந்நாடக சபாவிற்கு நல்ல வரவேற்பு கிடைத்து வந்தது .

1939 முதல் 1945 வரை , இரண்டாம் உலகப் போர் நடந்து வந்த காலம் ; வெள்ளையரின் ஆட்சிக்கு எதிராக நாடெங்கும் சுதந்திரப் போர் மூண்டெழுந்த காலம் . இந்தக் காலக்கட்டத்தில் , வெறும் புராண நாடகங்களை மட்டும் நடத்திக் கொண்டிருக்காமல் , மகாகவி பாரதி வழியில் நாட்டு விடுதலைக்காக நாடகக் கலையும் தொண்டாற்ற வேண்டும் என்கிற உயரிய நோக்கில் டி.கே.எஸ் நாடக சபா செயல்பட ஆரம்பித்தது . இதற்குச் சான்றாக வெ.சாமிநாத சர்மா எழுதிய ' பாணபுரத்து வீரன் ' எனும் நாடகத்தை இவர்கள் அரங்கேற்றியதையும் , அது பிரிட்டிஷ் ஆட்சியரால் தடை செய்யப்பட்டதையும் கூறலாம் . நாஞ்சில் நாட்டில் பிறந்த டி.கே.எஸ். சகோதரர்கள் நால்வருமே நாட்டுப்பற்றும் , மொழிப்பற்றும் , இனப்பற்றும் கொண்டவர்கள் . இவர்கள் மனோன்மணியம் சுந்தரனாரின் உறவினர்கள் என்று நானறிகிறேன் . அது மட்டுமல்ல , கவிமணி தேசிய விநாயகம் பிள்ளையின் பூரண அன்பையும் , ஆதரவையும் இவர்கள் பெற்றிருந்தார்கள் . அத்துடன் நாஞ்சில் நாட்டு பூதப்பாண்டியில் உதித்த தோழர் ஜீவானந்தத்தின் மீது அளவற்ற அன்பும் , மதிப்பும் கொண்டு , அவரை தம் சொந்த சகோதரர்களில் ஒருவராகவே கருதினர் . வெள்ளையர் ஆட்சியின் போது , ஜீவா தலைமை தாங்கிய கட்சி தடை செய்யப்பட்டு , அவர் வேட்டையாடப் பட்டார் . அப்போது தலைமறைவாக இயங்கி வந்த ஜீவாவிற்கு டி.கே.எஸ் நாடக சபா சில காலம் அடைக்கலம் கொடுத்தது என்பதுவும் ஒரு குறிப்பிட்ட வரலாற்றுச் செய்தியாகும் .

இரண்டாம் மகா யுத்தக் காலத்தில் , இவர்களது நாடக அரங்கேற்றம் தொடங்குவதற்கு முன்பு திரைச்சீலையில் ' உலகத் தொழிலாளர்களே ஒன்றுபடுங்கள் ' என்கிற வாசகம் பொறிக்கப்பட்டிருந்தது . மகாகவி பாடிய ' புதிய ருஷ்யா ' எனும் பாடலும் , தமிழ்த்தென்றல் திரு.வி.க தலைமை தாங்கிய தொழிலாளர் இயக்கப் போராட்டங்களும் , இவர்களது இந்த வாசகங்களுக்கு அடித்தளமாக இருந்திருக்கலாம் என்று எனக்குத் தோன்றுகிறது . சில ஆண்டுகளுக்குப் பின்னர் , 1941-42 ஆம் ஆண்டுக் காலக்கட்டத்தில் , நாடகத்தின் தொடக்கத்தில் ' வாழ்க்கை சிறிது ; வளர்கலை பெரிது ' எனும் வாசகம் நாடகத் திரைச்சீலையில் இடம்பெற்றிருந்தது .

இத்தருணத்தில் பிரசண்ட விகடன் ஆசிரியர் நாரண துரைக்கண்ணன் எழுதிய ' உயிரோவியம் ' எனும் நாவலை இவர்கள் நாடகமாக அரங்கேற்றினர் . தமிழகமெங்கும் அரங்கேறிய இந்நாடகம் நல்ல வரவேற்பைப் பெற்றது . 1941-க்குப் பிறகு கல்கியினுடைய வரலாற்று நாவல்களான ' பொன்னியின் செல்வன் , சிவகாமியின் சபதம் , பார்த்திபன் கனவு ' ஆகியவை தமிழகத்தின் ஒவ்வொரு வீடுகளிலும் ரசித்துப் படிக்கப்பட்டன . தமிழ் மக்களின் ரசனையில் ஏற்பட்டிருந்த இந்த மாற்றத்தை கணக்கில் எடுத்துக் கொண்ட டி.கே.சண்முகம் , ' ராஜராஜ சோழன் ' போன்ற வரலாற்று நாடகங்களை அரங்கேற்ற ஆரம்பித்தார் . டி.கே.எஸ். நாடக சபாவின் பேரும் புகழும் ஔங்குவதற்கு இத்தகைய வரலாற்று நாடகங்கள் பெரிதும் துணை புரிந்தன .

இந்தச் சூழ்நிலையில் தான் வல்லிக்கண்ணனுடைய கடிதம் டி.கே.சண்முகத்தை சென்றடைந்தது . ' டி.கே.எஸ் நாடக சபாவில் சிறிது காலம் தங்கி நாடகக் கலையில் பயிற்சி பெறவும் , நாடகங்கள் எழுதவும் தனக்கு வாய்ப்பளிக்க வேண்டும் ' என அக்கடிதத்தில் குறிப்பிட்டிருந்தார் வல்லிக்கண்ணன் . ஆனால் , ' இப்பொழுது தங்களை அழைத்துக் கொள்ள இயலவில்லை . பின்னாளில் வாய்ப்பு தருகிறோம் ' என டி.கே.சண்முகம் வல்லிக்கண்ணனுக்கு பதில் எழுதினார் . தன்னுடைய முயற்சி தோல்வியடைந்ததைப் பற்றி வல்லிக்கண்ணன் சிறிதும் கவலைப்பட்டுக் கொள்ளவில்லை.

காலச்சக்கர வேகத்தில் , 1943-47 ஆம் ஆண்டுக் காலக்கட்டத்தில் , கிராம ஊழியன் ஆசிரியராக வல்லிக்கண்ணன் பணியாற்றிக் கொண்டிருந்த போது , திருச்சியிலும் , தஞ்சாவூரிலும் , டி.கே.எஸ் நாடகங்கள் நடத்தப்பட்டன . அந்த நாடகங்களை பற்றி கிராம ஊழியனில் விமர்சனங்கள் எழுத வேண்டும் என்றும் , சிறப்பு விருந்தினராக தங்கள் நாடக மன்றத்துக்கு வரவேண்டுமென்றும் வல்லிக்கண்ணனுக்கு அழைப்பு விடுத்தார் டி.கே.சண்முகம் . அப்பொழுது தான் ஒளவையார் நாடகத்தில் ' ஒளவையார் ' வேடத்தில் நடித்து , அவ்வை சண்முகம் எனும் பெயரால் தமிழ் மக்களின் நெஞ்சங்களின் இடம்புகுந்தார் டி.கே.சண்முகம் . வல்லிக்கண்ணன் கிராம ஊழியனில் எழுதிய நீண்ட விரிவான நாடக விமர்சனங்கள் , நாடக ரசிகர்களின் மத்தியில் டி.கே.சண்முகத்திற்கு பெரிய அங்கீகாரத்தையும் , கெளரவத்தையும் பெற்றுத் தந்தன . ஒரு நாடக விமர்சனம் எவ்வாறு எழுதப்பட வேண்டும் என்பதற்கு உரிய சான்றாக வல்லிக்கண்ணனின் நாடக விமர்சனங்கள் அமைந்தன . இவை டி.கே.எஸ் நாடக சபாவின் வளர்ச்சிக்கு உதவின என்பதுடன் தமிழ் நாடகத்துறையின் வளர்ச்சிக்கும் , எழுச்சிக்கும் கணிசமான பங்காற்றின என்று கூறலாம் . இதன் விளைவாக , ஒரு நாடகக் கலைஞன் - ஒரு பத்திரிக்கை ஆசிரியன் என்கிற நிலையைத் தாண்டி , வல்லிக்கண்ணனை தங்களுடைய உடன்பிறவா சகோதரர்களில் ஒருவராகவே ஏற்றுக் கொண்டனர் டி.கே.எஸ.சகோதரர்கள் . டி.கே.சண்முகத்தின் கருத்து எதுவோ , அதுவே டி.கே.எஸ சகோதரர்கள் அனைவரின் கருத்துமாகும் .

காலக்கிரமத்தில் வயது முதிர்ச்சியின் காரணமாக மூத்த சகோதரர்களான டி.கே.சங்கரனும் , டி.கே.முத்துசாமியின் நாகர்கோவிலில் தங்கி விவசாயத்தில் ஈடுபடலாயினர் . நாடக சபாவை நிர்வகிக்கும் பொறுப்பை டி.கே.சண்முகத்திடமும் , டி.கே.பகவதியிடமும் விட்டுவிட்டனர் . நாடக சபாவின் மூளையாகவும் , இருதயமாகவும் டி.கே.சண்முகம் விளங்க , நிர்வாக பொறுப்பு முழுவதையும் டி.கே.பகவதி ஏற்று திறம்பட செய்து வந்தார் . இவர்களிருவரும் வல்லிக்கண்ணன் பால் மாறாத அன்பு கொண்டிருந்தனர் . வல்லிக்கண்ணனுடைய வாழ்க்கை முன்னேற்றத்திற்கு பொருளாதார ரீதியில் உதவும் பொருட்டு , பல திட்டங்களை வகுத்திருந்தனர் டி.கே.எஸ் சகோதரர்கள் .

அப்பொழுது ஏ.எஸ்.ஏ.சாமி எழுதிய ' பில்ஹணன் ' என்கிற நாடகத்தை டி.கே.எஸ் நாடக சபா ஈரோட்டில் அரங்கேற்றியது . இந்த நாடகம் பாரதிதாசனின் ' புரட்சிக்கவி ' எனும் காவியத்தைத் தழுவியதாகும் . இந்நாடகம் நூல் வடிவில் வந்து , அப்போது ' தினசரி ' யில் பணியாற்றிக் கொண்டிருந்த புதுமைப்பித்தனின் விமர்சனத்திற்கு வந்து சேர்ந்தது . பாரதிதாசன் காவியத்தின் தழுவல் என்று இந்நூலில் எங்கும் குறிப்பிடப்படவில்லை . ஏ.எஸ்.ஏ.சாமியின் நேர்மையற்ற போக்கைக் கண்டு கொதித்தெழுந்த புதுமைப்பித்தன் ' இரவல் விசிறி மடிப்பு ' எனும் தலைப்பில் தனது வன்மையான கண்டனத்தை வெளிப்படுத்தியிருந்தார் என்பது குறிப்பிடத்தக்கது . ஆனால் இந்த ஏ.எஸ.ஏ.சாமியின் ' முன்னேற்றத்தை ' புதுமைப்பித்தனால் தடுக்க முடியவில்லை . அவர் நாடகத்துறையில் இருந்து முன்னேறி ஜூபிடர் பிக்ஸர்ஸின் இயக்குநர்களில் ஒருவராக உயர்ந்து விட்டார் . அப்போது அவர் ஆறு படங்களுக்கு கதை வசனம் எழுதவும் , இயக்கவும் வாய்ப்பு பெற்று புகழ் ஏணியின் உச்சத்தில் இருந்தார் . அவரைப் பயன்படுத்தி திரைப்படத்துறையில் வல்லிக்கண்ணனை ஈடுபடச் செய்து , அவரது வாழ்வுக்கு வளம் சேர்க்கலாம் என விரும்பினார் டி.கே.சண்முகம் .

அப்போது கிராம ஊழியன் ஆசிரியராக பணியாற்றிக் கொண்டிருந்த வல்லிக்கண்ணனை ஜூபிடர் பிக்ஸர்ஸ் அலுவலகத்திற்கு அழைத்துச் சென்றார் . மூவருக்குமிடையே பேச்சுவார்த்தை நடந்தன . தான் இயக்கும் ஆறு படங்களுக்கு கதை வசனம் எழுதித் தரவேண்டுமென்றும் , ஆனால் திரையில் வல்லிக்கண்ணனுடைய பெயர் வராது என்றும் தனது ஏழாவது படமான முருகன் டாக்கீஸ் எடுக்கும் ' ரத்னகுமார் ' எனும் படத்தில் கதை வசனத்தில் வல்லிக்கண்ணனுடைய பெயர் இடம்பெறும் என்றும் , அதே சமயம் ஆறு படங்களுக்கு பணியாற்றும் வல்லிக்கண்ணனிற்கு கணிசமான சம்பளமும், பிற வசதிகளும் செய்துத் தரப்படுமென்றும் , கிராம ஊழியனில் பணியாற்றினாலும் , திருச்சியிலிருந்து கோவைக்கு அடிக்கடி வந்து தன்னுடன் பணியாற்ற சகல வசதிகளும் வழங்கப்படவேண்டுமென்றும் ஆசை காட்டி பேரம் பேசினார் ஏ.எஸ்.ஏ.சாமி . ஆனால் அவரது நிபந்தனைகளை கண்ட வல்லிக்கண்ணன் மிகுந்த அதிர்ச்சியும் துயரமும் கொண்டார் . எனினும் தனது கோபத்தையும் , வருத்தத்தையும் அவர் வெளிக்காட்டிக் கொள்ளவில்லை . ஒரு உண்மையாக கலைஞன் என்ற நிலையில் எந்தவொரு சூழ்நிலையிலும் தனது தன்மானத்தையும் , கெளரவத்தையும் அவர் அடகு வைக்கவோ , விற்கவோ விரும்பவில்லை . ' நான் பத்திரிக்கைதுறையில் தொடர்ந்து பணியாற்றவே விரும்புகிறேன் . இலக்கியத்துறையில் தான் எனது முழு ஈடுபாடும் உள்ளது ' என்று மென்மையாகவும் , உறுதியாகவும் ஏ.எஸ்.ஏ.சாமியிடம் கூறி விட்டு பேச்சை முடித்துக் கொண்டார் . வல்லிக்கண்ணனின் முடிவு டி.கே.சண்முகத்திற்கு மிகுந்த ஏமாற்றமும் ,. வருத்தமும் அளிப்பதாக இருப்பினும் , அவரது சுயமரியாதைப் போக்கையும் , இலக்கிய தாகத்தையும் கண்டு வியந்து பாராட்டினார் .எனினும் வல்லிக்கண்ணனிற்கு தொடர்ந்து ஆதரவளிக்கவே அவர் விரும்பினார் .

சிறிது காலத்திற்குப் பின்னர் , கோவையில் நாடக மாநாடு ஒன்று நடைபெற்றது. அதில் டி.கே.சண்முகமும் , வல்லிக்கண்ணனும் பங்கேற்றனர் . மாநாட்டின் இறுதியில் ' நாடகம் ' எனும் பெயரில் ஒரு மாத ஏடு துவங்குவது என்றும் , அதற்கு வல்லிக்கண்ணனை ஆசிரியராக நியமிப்பது என்றும் டி.கே.சண்முகம் முடிவெடுத்தார் . இதை வல்லிக்கண்ணனிடம் டி.கே.சண்முகம் நேரில் தெரிவித்து , பத்திரிக்கையின் பொறுப்பை ஏற்றுக் கொள்ளும்படி சொன்ன போது , அவருக்கு மற்றொரு அதிர்ச்சி காத்திருந்தது . தனது அருமை சகோதரர் டி.கே.சண்முகத்தின் அன்பு அழைப்பை ஏற்க வல்லிக்கண்ணன் மறுத்து விட்டார் . ஏனெனில் இந்த ஏற்பாடு தனக்கு ஒத்து வராது என கிராம ஊழியன் அனுபவத்தின் வாயிலாக வல்லிக்கண்ணன் நன்கு உணர்ந்திருந்தார் . தமது மறுப்பையும் மென்மையாக டி.கே.சண்முகத்திடம் தெரிவித்து விட்டார் . இந்த நிகழ்வால் டி.கே.சண்முகத்தால் வருந்தத் தான் முடிந்தது . எனினும் வல்லிக்கண்ணன் மீதான் அன்பையும் , மரியாதையையும் அவர் எள்ளளவும் குறைத்துக் கொள்ளவில்லை . டி.கே.சண்முகத்தின் இறுதிக்காலம் வரையில் இருவருக்கிடையேயான சகோதரப் பாசம் மென்மேலும் வளர்ந்து வந்தது .

' ரத்தபாசம் , மனிதன் ' போன்ற நாடகங்களை அரங்கேற்றிய மாபெரும் நாடகக் கலைஞன் அல்லவா அவ்வை.டி.கே.சண்முகம் ... ? !

நன்றி : யுகமாயினி - ஜனவரி 2011 இதழ்