தி.க.சி

அறிகுறிகள் எதுவும் தோன்றவில்லை

2012-02-15T03:23:00.000-08:00

( 09-02-2012 தினமணி நாளிதழில் வெளியான தி.க.சி.யின் கடிதம் )

' ஊழல் ஒழிய ஒர் அருமருந்து ' கட்டுரை படித்தேன். ஊழலின் ஊற்றுக்கண்ணாக விளங்குவது , ராகுல்காந்தியின் குடும்பம். அந்தக் குடும்பத்தின் நீண்டகால சுயநல ஆட்சிப் பிடியிலிருந்து விடுதலை பெற்றால் தான் , நம் நாட்டில் ஊழல்கள் ஒழியும் . நாடும் மக்களும் நலமாக , வளமாக வாழ முடியும் எனும் கட்டுரையாளரின் கருத்து ஏற்கத்தக்கது.
ராஜீவ்காந்தியின் காலத்திலிருந்து இந்திய அரசியல் , பொருளாதார, சமுதாய , கல்வி, கலாசார வரலாற்றுப் போக்கை நடுநிலையில் நின்று ஆராய்பவர்கள் , ராகுல்காந்தியின் குடும்ப ஆட்சி விரைவில் முடிவுக்கு வர வேண்டும் என்றே விரும்புவர். ஆனால், அவர்களது ஆர்வ விருப்பங்களும் நியாயமான கனவுகளும் விரைவில் நிறைவேறுவதற்கான நடைமுறை அறிகுறிகள் எதுவும் இன்றைய அரசியல் சூழலில் , இந்தியாவிலுள்ள அனைத்துக் கட்சிகளின் பலத்தையும், பலவீனங்களையும், எடை போட்டுப் பார்க்கும் போது தோன்றவில்லை . ராகுல்காந்தியின் குடும்பம் கட்சியிலிருந்தும் நாட்டு அரசியலில் இருந்தும் தாங்கள் செய்யும் ஊழல் மறைப்பு மோசடிகளிலிருந்தும் எளிதில் வெளியேறாது . வருகின்ற 2014 நாடாளுமன்றத் தேர்தல் முடிவுகளும் அதன் விளைவாகத் தோன்றும் மத்திய அரசின் அமைப்பும் தான் , வருங்காலத்தில் ஊழலற்ற, சுதந்திர, ஜனநாயக, மதச்சார்பற்ற, மக்கள் நல குடியரசை தீர்மானிக்க முடியும்.

நன்றி : தினமணி நாளிதழ் - 09-02-2012

Book released

2012-02-06T22:21:00.000-08:00

( Literary critic Thi. Ka. Si. releasing the book and film director Sugha receiving the first copy )

Writer Naarumpoonathan's ‘Jameelaavai yenakku arimugappaduththiyavan' book release function was held here on Saturday. Veteran literary critic Thi. Ka. Si. released the book and film director Sugha received the first copy. Writers Vannadasan, Udhayasankar, Zakhir Raja and Selvaraj spoke. Veteran writer Thoppil Mohamed Meeran, artist Pon. Vallinayagam and others participated. Performance by singers ‘Karisal Kuyil' and Thiruvudaiyaan, known for his song ‘Aaththaa un selai…', set an apt prelude to the book release function.

Thanks : The Hindu , February 7, 2012

வெளிப்படைத் தன்மை வேண்டும் !

2012-02-04T22:23:00.000-08:00

( 04 -02 -2012 தினமணி நாளிதழில் வெளியான தி.க.சியின் கடிதம் )

சாஹித்ய அகாடமியின் நடவடிக்கைகளும் , முடிவுகளும் தேர்வுகளும் மிகுந்த வெளிப்படைத் தன்மையுடன் நிகழ வேண்டும்;. அறிவிக்கப்பெற வேண்டும் . குறிப்பாக, நடுவர் குழுவினர் பெயர்கள் , அவர்களின் பரிசீலனைக்கு வந்த படைப்புகள் , அவற்றின் தரம் பற்றிய மதிப்பீடுகள் இவை விருது அறிவிப்புச் செய்தியை வெளியிடும்போதே , பத்திரிக்கைகளுக்கும் ஊடகங்களுக்கும் அறிவிக்கப்பெறலாம் ; அப்படியானால் , சாஹித்ய அகாடெமிக்கு நற்பெயர் கூடலாம் !

நன்றி : தினமணி நாளிதழ் - 04 -02 -2012

மூர்க்கத்தனமான பிடிவாதம் !

2012-02-03T02:31:00.000-08:00

( 31-01-2012 தினமணி நாளிதழில் வெளியான தி.க.சி.யின் கடிதம் )

தீர்ப்புக்குப் பின்னால் ? தலையங்கம் படித்தேன் . அன்னிய நேரடி முதலீட்டுக்குஒவ்வொரு துறையாக வாசல் கதவுகளைத் திறந்து விட்டு , அழைப்பு விடுக்கும்மத்திய அரசின் போக்கு, நாட்டின் நலன் கெடுக்கும் நாசகாரப் போக்கு என்பதைதெளிவாகவும் திட்டவட்டமாகவும் வாசகர்களுக்கு உணர்த்துகிறது. வோடபோன்எனும் பன்னாட்டு நிறுவனம் , இந்திய வருமான வரித்துறைக்குச் செலுத்தவேண்டிய ரூ.11000/- கோடியை நாம் இழந்து விட்டோம் . இதற்கு முக்கியக் காரணம் , நமது ஆட்சியாளர்களும் , அரசியல்வாதிகளும் தான் என்பதில் சற்றும் ஐயமில்லை . நாட்டின் சில்லறை வணிகத்துறையில் அன்னிய நேரடி முதலீட்டுக்குவகைசெய்யும் அபாயகரமான கொள்கையை மட்டுமன்றி , விவசாயத்துறை, தொழில்துறை, கல்வித்துறை, மருத்துவத்துறை முதலிய அனைத்துத்துறைகளிலும் அன்னிய நேரடி முதலீடுகளின் கை மேலோங்கியிருக்க வேண்டும்எனும் தீய கொள்கையையும், சட்ட திட்டங்களையும் அமல் நடத்துவதில்மன்மோகன் சிங் அரசு, மூர்க்கத்தனமான பிடிவாதத்துடன் செயல்பட்டுக்கொண்டிருக்கிறது . அதே வேளையில் நாட்டு மக்களின் மீது புதியவரிச்சுமைகளைச் சுமத்தி , விலைவாசிகள் விண்ணை முட்டும் அளவுக்கும் , மக்கள்நாள்தோறும் தற்கொலை செய்து கொள்ளும் கொடிய நிலைமைக்கும் , நாட்டின்கஜானா காலியாகி நாடு ஒட்டாண்டியாகி பன்னாட்டு நிறுவனங்களின்வேட்டைக்காடு ஆவதற்கும் , நாட்டின் சுதந்திரமுன்ம் , இறையாண்மையும்பறிபோவதற்கும், மத்திய அரசு திட்டமிட்டுச் செயல்படுகிறது . சுருங்கச்சொன்னால், நாட்டை விலைபேசிக் கொண்டிருக்கிறது ; இத்தகைய சிந்தனைகளைஎன்னுள் விதைக்கிறது, தினமணியின் தலையங்கம் .

நன்றி : தினமணி நாளிதழ் - 31-01-2012

வழியில் மலை போல .. !

2012-01-25T01:07:00.000-08:00

- தி.க.சி -

அண்மையில் ஈரோட்டில் 11-12-2011 அன்று மக்கள் சிந்தனை பேரவையால் நடத்தப்பட்ட பாரதி விழாவில் பங்கு பெற்றேன். தோழர் ஸ்டாலின் குணசேகரன் இந்த ஒருங்கிணைப்பை நிகழ்த்துவதில் முக்கிய பங்கு கொண்டு , பல ஆண்டுகளாக தொடர்ந்து இது போன்ற விழாக்களை அந்தப் பகுதியில் நடத்தி வருகிறார். இந்த விழாவில் பாரதி விருது பெறும் பேறு எனக்கு கிட்டியது .

மறுநாள் 12-12-2011 மாலையில் பகுத்தறிவு பகலவன் தந்தை பெரியார் பிறந்த இல்லம் மற்றும் அவர் நடத்திய குடியரசு பத்திரிக்கை அலுவலகத்தையும் பார்வையிட்டேன் . அதன் பின்னர் கருங்கல்பாளையத்திலுள்ள படிப்பகமொன்றிற்கு சென்றிருந்தேன் . இந்த படிப்பகத்தில் தான், பாரதி தான் மறைவதற்கு சில நாட்களுக்கு முன்பு இந்தியாவின் எதிர்காலம் பற்றி இறுதி உரையாற்றி உள்ளார். இவ்விரண்டு நினைவு இல்லங்களுக்கு சென்று விட்டு அன்றிரவு ரயிலில் நெல்லை திரும்புகையில் எனது எண்ண ஒட்டங்கள் பாரதி இறுதியுரையாற்றிய இந்தியாவின் எதிர்காலம் , குறிப்பாக தமிழக படைப்பாளிகள் , மக்கள், ஊடகங்கள் மற்றும் இன்றைய ஆட்சியாளர்களின் போக்குகள் குறித்து சுழல ஆரம்பித்தன .

பாரதி மறைந்து 90 ஆண்டுகள் ஆகிவிட்டன . ' நமக்குத் தொழில் கவிதை / நாட்டிற்குழைத்தல் / இமைப்பொழுதும் சோராதிருத்தல் எனவும், நாட்டு மக்கள் நலமுற்று வாழவும் / நானிலத்தவர் மேனிலை எய்தவும்’ என அவன் கனவு கண்ட லட்சியங்கள் நிறைவேறியிருக்கின்றனவா என்று சிந்தித்திப் பார்க்க வேண்டிய கட்டாயத்தில் இன்று நாம் இருக்கிறோம் .

பிரிட்டிஷ் ஏகாதிப்பத்தியத்திற்கு எதிராக, நாட்டு விடுதலைக்காகவும், சமத்துவத்திற்காகவும், சமநீதிக்காகவும் , மக்களுடைய நல்வாழ்வுக்காகவும் அயராது தனது ஆற்றலைகளை அர்ப்பணித்த அற்புத போராளி அவன் ; பேனா வீரன் அவன் .

இன்று நாடு விடுதலைப் பெற்று 64 ஆண்டுகள் ஆகிவிட்டன . உலக அரங்கில் இந்தியாவின் செல்வாக்கு மிகவும் உயர்ந்து விட்டது என்று பரப்புரை செய்யப்படுகிறது . ஆனால் இன்றைய நிலைமை வேறு விதமாக இருக்கிறது .

வரலாற்று உண்மைகளை நடுநிலைமையுடன் ஆராயும்பொழுது ஏழைகள் மேன்மேலும் ஏழைகள் ஆகிக் கொண்டிருக்கிறார்கள் . மக்கள் தொகையில் பெரும் பகுதி வறுமையில் உழல்கிறார்கள் . ஆனால் நாட்டில் 20 சதவீதம் பேர் சகல வசதிகளையும் பெற்று ஆடம்பரத்தில் திளைத்து கொண்டிருக்கிறார்கள் . அது மட்டுமன்றி , அரசியல் அதிகாரத்தையும் தங்கள் கைவசம் வைத்துள்ளனர். இந்த இருதுருவநிலை மேலும் மேலும் விரிவடைந்து கொண்டே வருவதால் நாடு முழுவதும் பல்வேறு துறைகளில் சீரழிவு முற்றிவருகிறது .

இந்தச் சூழ்நிலையில், தமிழகத்தில் கலை, இலக்கியத்துறையின் இன்றைய நிலவரம் எவ்வாறாக உள்ளது ? குறிப்பாக கடந்த 21 ஆண்டுகளில் நிகழ்ந்தது என்ன என்பதை சற்று சுருக்கமாக ஆராய்வோம். 1921 இல் பாரதி மறைந்தாலும் , அவரைப் பின்பற்றி பாரதிதாசனும் , மணிக்கொடி இலக்கிய இயக்கத்தின் தலைசிறந்த சாதனையாளரான புதுமைப்பித்தனும் , பாரதியாரின் கொள்கைகளை கடைக்கோடி தரித்திர நாராயணர்களுக்கும், உழைப்பாளி மக்களுக்கும் ஊர் ஊராக தெருத் தெருவாக எடுத்துச் சென்று உணர்வூட்டிய தோழர் ஜீவானந்தமும் இயற்றிய பணிகளை நாம் இன்றும் நினைவில் கொண்டிருக்கிறோமா எனத் தெரியவில்லை .

இவர்களை நினைவில் கொள்ள முடியாத அளவுக்கு இன்றைக்கு பெரும்பாலான அச்சு ஊடகங்களும், காட்சி ஊடகங்களும் மாபெரும் நந்திகளாக வழிமறித்து நிற்கின்றன. திரைத்துறை மற்றும் விளையாட்டுத்துறையைச் சார்ந்த சூப்பர் ஸ்டார்களின் சிறு அசைவுகளுக்குக் கூட பெரும் முக்கியத்துவம் கொடுப்பதே இந்த நந்திகளின் நாளும் பொழுதும் வேலையாகிவிட்டது . இந்த சூப்பர் ஸ்டார்களை தாங்கிப் பிடித்து அவர்களின் உயர்வுக்கு எல்லா வகையிலும் வகை செய்து கொண்டிருக்கின்ற ஊழல் அரசியல்வாதிகளையும், ஆட்சியாளர்களையும் நாம் எளிதில் புறக்கணிக்க முடியாது .

பெருவாரியான ஊடகங்களை கைப்பற்றிக் கொண்டு மக்களின் ரசனையையும், போர்க்குணத்தையும் மலிவான பாதைக்கு திசைதிருப்பச் செய்ததில் இந்த கூட்டணியின் பங்கு அசாத்தியமானது . இதன் விளைவாக, கருத்துலகில் இவர்களினுடைய ஆதிக்கம் வலுத்து வருகிறது . பாரதி, பாரதிதாசன் , புதுமைப்பித்தனுடைய கொள்கைகளும், பணிகளும் மழுங்கடிக்கப்பட்டு படுபாதாளத்தில் ஆழ்த்தப்பட்டுவிட்டன .

இவர்களினுடைய கலாச்சாரம் சந்தை கலாச்சாரம் . இந்த கலாச்சாரத்தின் மூலமாக மக்களை மந்தைகளாகவும் , சுயசிந்தனையற்ற அடிமைகளாகவும் ஆக்கிவிட்டனர். இவர்கள் சுதந்திரம், ஜனநாயகம், நாட்டு மக்களின் முன்னேற்றம் என பேசிக் கொண்டே மக்களின் மீதான தங்களின் ஆதிக்கப் பிடியை அதிகரித்துக் கொண்டு வருகிறார்கள் . இந்த இழிநிலையை மாற்றுவதற்கு நானும் எனது நண்பர்களும் இரவு பகலாக சிந்தித்து வருகிறோம்.

ஒரு தமிழ்ப்படைப்பாளி தன்னுடைய படைப்பை உலகத்தரத்திற்கு எடுத்துச் செல்ல விரும்பினால் , அதற்கு தடையாக பிற்போக்கு சக்திகள் கூட்டணி வகுத்து நிற்கின்றன. இந்தக் கூட்டணியை உடைத்தெறிவதற்கு ஜீவா பாதையில் சில இயக்கங்களும், அமைப்புகளும் செயல்பட்டு வருகின்றன . இது மகிழ்ச்சிக்குரிய ஆக்கப்பூர்வமான சூழலாகும்.

'எங்கள் வாழ்வும், எங்கள் வளமும் , மங்காத தமிழ் என்று சங்கே முழங்கு' என்று நாம் சொல்லிக் கொண்டிருக்கிறோம். இந்த உணர்வு நமக்கு எப்போதும் இருக்க வேண்டியது அவசியம் தான் . இன்று தமிழினம் உலகம் முழுவதும் பரவிக் கிடக்கிறது . புதிய கலாசாரத்தை சமைப்பதற்கும் , புதிய மக்களை உருவாக்குவதற்கும் உலகளாவிய தமிழர்களை ஒன்று திரட்டி போராட வேண்டியது இன்றியமையாத கடமையாகும் . இது ஒரு கூட்டு முயற்சி. இதற்கான கூட்டு இயக்கம் காணப்பட வேண்டும் , வலுப்படுத்தப்பட வேண்டும் என்பதே எனது பணிவான கருத்தாகும் .

ஒப்புக்கொள்ளும் காலம் வந்துவிட்டது

2012-01-18T02:24:00.000-08:00

( 14.01.2012 தினமணி நாளிதழில் வெளியான தி.க.சி.யின் கடிதம் )

பாரதிய 'சாதா'! தலையங்கம் படித்தேன். 2012 புத்தாண்டின் தொடக்கத்தில், தினமணியில் வந்துள்ள நாட்டுபற்றும், மக்கட்பற்றும் மிகுந்த கொள்கைத் திறம்வாய்ந்த அரிய தலையங்கம் இது.

' ஊருக்கு நல்லது சொல்வேன்; உண்மை தெரிந்து சொல்வேன் ' எனும் மகாகவி பாரதி வாக்கின் ஒளியில் நாட்டின் இரண்டாவது பெரிய கட்சியான பாரதிய ஜனதா , எவ்வாறு பாரதிய 'சாதா' ஆகிவிட்டது என்பதை வாசகர்களுக்கு, உரிய வேளையில் நேர்கொண்ட பார்வையுடன் , மறுக்க இயலாத சான்று ஆதாரங்களுடன் தலையங்கம் தெளிவுப்டுத்துகிறது .

ஊழலை எதிர்த்துப் பேசும் தார்மிக உரிமையை பாரதிய ஜனதாக் கட்சி இழந்து விட்டது என்பதற்கு, குஷ்வாகா பிரச்னை இன்னொரு உதாரணம், அவ்வளவே! என்னும் தலையங்க வரிகளை தமிழகத்தில் நெஞ்சில் உரமும் நேர்மைத் திறமும் கொண்ட பாரதிய ஜனதா கட்சி உறுப்பினர்களும் ஆதரவாளர்களும் ஒப்புக் கொள்ளும் காலம் வந்து விட்டது என்றே தோன்றுகிறது . இந்த உண்மையை ஊடகத்துறை அறிவுஜீவிகளும் , இதழியலாளர்களும் உணர்ந்தால் நல்லது !

நன்றி : தினமணி நாளிதழ் - 14.01.2012

அப்பாவுக்கு அந்த ரத்னா டாக்கீஸ் பிடிக்கும் போல... !

2012-01-11T08:23:00.000-08:00

( தீராநதி - ஜூன் 2010 இதழில் வெளியான வண்ணதாசன் நேர்காணலிலிருந்து சில பகுதிகள் )

தீராநதி : இப்போது வரை உற்சாகத்துடன் இயங்கி வரும் உங்கள் தந்தை தி.க.சிவசங்கரன் அவர்களைப் பற்றிய சிறு வயது நினைவுகளைக் கூறுங்கள்.

வண்ணதாசன் : என் சிறு வயது ஞாபகங்களில் அப்பாவின் நடமாட்டம் ரொம்பக் குறைவு. என் சிறு வயதை நிரப்பியவர்கள் எங்களின் அம்மாத் தாத்தாவும், அம்மாச்சியும், அம்மாவும், கணபதி அண்ணனும்தான். ஐந்தாம் கிளாஸ் வரைக்கும் எங்கள் தாத்தா கையைப் பிடித்துக் கொண்டுதான் ஸ்கூலுக்குப் போயிருக்கிறேன். நினைச்சுப் பார்த்தால் இப்போ கஷ்டமாகக் கூட இருக்கு. எங்கள் தெரு வழியாக, எங்கள் அப்பாவின் விரலைப் பிடித்துக் கொண்டு ஒரு தடவை கூட நானோ, எங்க அண்ணனோ நடந்து போனதே இல்லை.

ஒரு தடவை காதில் ஏதோ அழுக்குச் சேர்ந்து வலி வந்தது எனக்கு. அப்பா என்னை டாக்டரிடம் கூட்டிப் போனார். ஒரு பீச்சாங்குழல் மாதிரி ஒன்றை வைத்து, காது ஓட்டையாகப் போகிற மாதிரி, தண்ணீரைப் பீய்ச்சி அழுக்கை எடுத்தார்கள். போகிற பாதையில் ஒரு ஆளுயரத் தபால்பெட்டி சிவப்பாக நின்றது இப்போது ஞாபகம் வருகிறது. இன்னொரு தடவை 7-ம் வகுப்பு படிக்கும்போது போர்டில் ஸார் எழுதுகிறது சரியாகத் தெரியலை என்று சொன்னதும் டாக்டர் கிருஷ்ணமூர்த்தி என்ற கண் டாக்டரிடம் கூட்டிப் போனதும் அப்பாதான். அந்த டாக்டர் பாடிக்கிட்டே வைத்தியம் பார்ப்பார். கண்ணுக்குள்ளே பாட்டரி லைட் அடிக்கும்போதும் அவர் பாடினார். அழிக்கம்பி போட்ட ஒரு மாடி அது. அங்கே அடித்த மருந்து வாசனையும், ஜெனித் ஆப்டிகல்ஸில் கண்ணாடி போட்டுக்கொள்ள உட்கார்ந்திருந்தபோது நுகர்ந்த ஒரு வாசனையும் இப்போ கூட மூக்கிலேயே இருக்கு. மூக்குக்கு, நாக்குக்கு எல்லாம் கூட தனித்தனியா ஞாபக சக்தி இருக்கும் போல. அதற்குப் பிறகு கொஞ்சம் வளர்ந்ததும், AFRICAN LION, LIVING DESERT படத்துக்கு எல்லாம் அப்பா ரத்னா டாக்கீஸிற்குக் கூட்டிப் போனார். சாந்தாராமுடைய `ஜனக் ஜனக் பாபல் பாஜே’ படத்துக்கும் அப்பாதான் கூட்டிப் போனார். அதுவும் ரத்னா டாக்கீஸில்தான். அப்பாவுக்கு அந்த ரத்னா டாக்கீஸ் பிடிக்கும் போல.

தீராநதி : தி.க.சி. அவர்களின் எழுத்துக்கள், அரசியல், பத்திரிகைப் பணி பற்றி ஒரு மகனாகவும் ஒரு எழுத்தாளராகவும் எப்படிக் கணிக்கிறீர்கள்?

வண்ணதாசன் : அப்படியெல்லாம் மகனாக, எழுத்தாளனாக எல்லாம் தனித்தனியாக, என்னால் அப்பாவைப் பற்றி மட்டுமல்ல, எதைப் பற்றியும் யோசிக்க முடியாது. நான் அப்படி யோசிக்கிறதுமில்லை. என்னைப் பொருத்தவரை தி.க.சி.ன்னா தாமரைதான். அதில் அப்பா செய்ததுதான். அதை அவரால்தான் செய்ய முடிந்தது. அதற்குப் பின்பு கூட அவரளவுக்கு வேறு யாரும் செய்யலை.

தீராநதி : சமீபத்தில் தி.க.சி. அவர்களைப் பற்றிய ஆவணப் படம் பார்த்தேன். அவரை மரியாதைப்படுத்தும் விதமாக அந்தப் படம் இருந்தது. நீங்களும் அந்தப் படத்தில் பங்கு பெற்றுள்ளீர்கள். அந்த ஆவணப் படம் பற்றிச் சொல்லுங்கள்.

வண்ணதாசன் : ஆமாம். அந்தப் படம் அப்பாவை மரியாதைப் படுத்தவே செய்தது. ஒரு ஆவணப்படம் எடுக்கப்படுவதும், அல்லது ஒரு ஆவணம் ஆவதுமே மரியாதைக்குரியதும் மரியாதை செலுத்துதலும் ஆனதுதானே. இதில் என்ன நல்ல விஷயம் என்றால், அதை எடுத்த ராஜகுமாரன் யார் என்றே முன்னே பின்னே தெரியாது. அவர் தமுஎச அல்லது கலை இலக்கியப் பெருமன்றம் சார்ந்தவரும் அல்ல. அமைப்பு அல்லது அரசியல் சார்ந்த அக்கறை எதுவும் அவருக்குக் கிடையாது. அவருக்குத் தோன்றியதும் ஆவணப்படுத்தியதும்தான், நீங்கள் குறிப்பிடுகிற, மரியாதை உணர்வு ஒன்று மட்டுமே காரணம் என்பதை நிச்சயப்படுத்துகிறது. ராஜகுமாரன் அவருக்குக் கிடைத்த ஆவணங்களின் தகவல்களின் அடிப்படையில், மிகச் சிரத்தையுடனும் அக்கறையுடனும் இதை எடுத்திருப்பதாகவே நினைக்கிறேன்.

இரண்டு நாட்களுக்குக் கேமராவை வாடகைக்கு அமர்த்திக்கொண்டு வந்து விட்டார். அப்போது அப்பாவுக்கு உடல்நலம் சரியில்லை. இனிமேல் வெறுமனே திரும்பிப் போகவும் ராஜகுமாரனால் இயலாது. கழனியூரன், கிருஷி, வள்ளிநாயகம் என்று நண்பர்களையும், தம்பி சேது, நான், என் தங்கை ஜெயா என்று குடும்பத்தினரையும் வைத்துக்கொண்டு எந்த அளவிற்கு அப்பாவைப் பதிவு செய்ய முடியுமோ அதைச் செய்துவிட்டார். என்னையெல்லாம் விட, என்னுடைய தங்கச்சியின் பேச்சுதான் ரொம்ப இயல்பாக அப்பாவைப் பற்றிப் பேசுகிறது.

எடுக்கப்பட்டது போலவே, இது அமைப்பு சாராத பலரால் திரையிடப்-பட்டது என்று ராஜகுமாரன் சொன்னார். திருப்பூர் தமிழ்ச்சங்கம் கூட குறும்பட ஆவணப்பட வரிசையில் இதற்கு இம் முறை பரிசளித்திருக்கிறது என்பது அப்பாவை மட்டுமல்ல, இந்த ஆவணப்படத்தையும் மரியாதைப்படுத்துகிற விஷயம்தானே அய்யனார்.

சந்திப்பு : பவுத்த அய்யனார்

குறையும் நகைச்சுவை உணர்வு !

2012-01-11T07:58:00.000-08:00

( 09 -01 -2012 தினமணி நாளிதழில் வெளியான தி.க.சி.யின் கடிதம் )

02 -01 -2012 தினமணியில் நகைச்சுவை உணர்வு இல்லையே ! எனும் தலைப்பில் , மத்திய உள்துறை அமைச்சர் ப.சிதம்பரத்தின் கடிதம் படித்தேன் .

எவ்வித அறிவு நேர்மையும் , நாணயமும் , பொறுப்பு உணர்வும் இல்லை என்பதை நையாண்டி செய்யும் முறையில் தான் மதியின் கேலிச்சித்திரங்கள் அமைந்துள்ளன . இதைப் பல்லாயிரக்கணக்கான தினமணி வாசகர்களும் , பொதுமக்களும் நன்கு உணர்ந்துள்ளனர் . ஆனால் இவர்கள் அனைவரும் தொலைக்காட்சியில் , பத்திரிக்கை நிருபர்களுக்கு எந்த உணர்வுடன் ! ப.சிதம்பரம் பேட்டியளித்தார் என்பதை காணும் பேறு பெற்றிருப்பர்களா என்பது சந்தேகமே ! தமிழகத்தின் மதிப்புக்கும் மரியாதைக்கும் உரிய உள்துறை அமைச்சருக்கு நகைச்சுவை உணர்வு உண்டு என்பதை ஓர் இதழியலாளர் என்ற முறையில் நான் அறிவேன் . ஆனால் அது இப்போது , மத்திய அரசின் கொள்கை அழுத்தத்தால் மிகவும் குறைந்து வருகிறது . இதையே மதியின் கார்ட்டூன் கூறுகிறது .

நன்றி : தினமணி நாளிதழ் - 09 -01 -2012

ஊழல்வாதிகளின் கரங்கள் வலுப்படும் !

2011-12-29T21:59:00.000-08:00

( 30-12-2011 தினமணி நாளிதழில் வெளியான தி.க.சி.யின் கடிதம் )

' மெய்ப்பொருள் காண்பது அறிவு ' என்னும் வள்ளுவர் வாக்குக்கு இணங்க, ' அண்ணா ஹசாரே - மனசாட்சி பதில் சொல்லட்டும் !' கட்டுரை குறித்துநடுநிலையுடன் சிந்திக்கும் போது , எனது மனசாட்சி, ஜெயமோகன் தரப்புவாதங்களிலுள்ள உண்மையையும் ,நேர்மையையும் , நியாயத்தையும் ஆதரிக்கிறது .

' அண்ணா ஹசாரேயும், ஜெயப்பிரகாஷ் நாராயணனைப் போலஅரசியல்வாதி அல்ல ; மக்கள் நடுவே இருந்து உருவாகி வந்த மக்கள் சேவகர்மட்டுமே . ஆகவே, அவரது மொழி , அரசியல்வாதியின் மொழியோ, ராஜதந்திரியின் மொழியோ அல்ல . மக்களின் உணர்ச்சிகளை அதுவும்சகஜமாகப் பிரதிபலிக்கிறது ; அதைத்தான் ஊடகம் மிகவும் எளிதாகக்கேலிக்குரியதாக ஆக்கிக் கொண்டிருக்கிறது ; ஊழலில் மூழ்கிய நம் நடுத்தரவர்க்கத்தின் ஒரு பகுதியினரின் கேலிக்கும் விவாதத்துக்கும் உள்ளாக்கிக்கொண்டிருக்கிறது , ஊடகம் ' என்று கட்டுரையாளர் , மிகச் சரியாகவே சுட்டிக்காட்டுகிறார் .

மேலும் ஆழமாகச் சிந்திக்கும் பொழுது, ஊழலுக்கு எதிரானமக்கள் திரளின் அறச்சீற்றத்தின் பல வடிவங்களில் ஒன்று தான் , அண்ணாஹசாரேயின் இயக்கமும் போராட்டமும் . இதை ஆதரித்து , ஆக்கப்பூர்வமானயோசனைகள் கூறுவதற்குப் பதிலாக , ஊடகங்களின் ஒரு பகுதியினர், எதிர்மறை நிலையில் செயல்படுவது , ஊழல்வாதிகளின் கரங்களையேவலுப்படுத்தும் .

நன்றி - தினமணி நாளிதழ் - 30-12-2011

காலம் தான் பதில் சொல்ல வேண்டும் ... !

2011-12-28T20:40:00.000-08:00

( 27-12-2011 தினமணி நாளிதழில் வெளியான தி.க.சி.யின் கடிதம் )

'கேரளத்தின் முந்தைய கால வரலாற்று நிகழ்வுகளுக்கு மாறாக, இன்றைய அணுகுமுறை, தமிழ்நாடு, கேரளா ஆகிய மாநிலங்களின் நீண்டகால உறவுக்கும் வளர்ச்சிக்கும் பெரும் பாதிப்பை ஏற்படுத்தும்' என 'வேடிக்கை பார்க்கக்கூடாது' கட்டுரையாளர் கூறுவது, தொலைநோக்கும், அரசியல் பொறுப்பும் மேலோங்கியுள்ள சமூகநலச் சிந்தனையாகும். ஆனால், இத்தகைய தொலைநோக்கும், மக்களின் நல்வாழ்வு சார்ந்த அக்கறையும் , மன்மோகன் சிங் அரசிடம் எள் அளவும் இருப்பதாகத் தெரியவில்லை . மிகவும் இன்றியமையாத, நியாயமான, உடனடித் தேவையான பிரச்னைக்களுக்குத் தீர்வு காண இயலாமல், பிரச்னைகள் காலப்போக்கில் தாமாகத் தீர்ந்து விடும் என்ற மூடநம்பிக்கையில் காலம் கடத்துவதும், மாநில மக்களிடையே குரோத விரோதங்களைப் பற்றி எரியச் செய்து வேடிக்கை பார்ப்பதும், மத்திய அரசின் 'ராஜதந்திர'மாக விளங்குகிறது . 2014-ம் ஆண்டில் நாடாளுமன்றத் தேர்தல்கள் வரும் வரையில், இப்படியே நடிப்புச் சுதேசிகளாக விளங்கிப் பதவியில் நீடித்திருக்கலாம் என்பது , அதன் திட்டவட்டமான கொள்கை நடைமுறை உண்மையும் அதுவே மத்திய அரசின் மக்கள் - விரோத கொள்கைக்கு முடிவு கட்டுவது எப்படி என்பதே , இன்று நம் முன் நிற்கும் கேள்வி ! காலம் தான் பதில் சொல்ல வேண்டும்.

நன்றி : தினமணி நாளிதழ் - 27-12-2011

Poet Bharathi’s Dreams Not Yet Fulfilled !

2011-12-21T23:03:00.000-08:00

Sahitya Akademy Awardee T K Sivasankaran had said that famous tamil poet Subramaniya Bharathi’s dream of making a prosperous India is not yet fructified even nearly 90 years after his death .

The 88 year old tamil writer , researcher and journalist from Nellai district was presented the Poet Bharathi Award for his services to Tamil language at Bharathi’s birthday celebrations organized by Makkal Sinthanai Peravai in Erode on 10-12-2011 Sunday .

In his speech, he quoted many poems of Bharathi and said ‘ The late poet dreamt about an independent india without poverty and slavery . He believed it will respect agriculture and industry. But , nearly 80 percent of people in the nation are still poor ‘ .

‘ Agriculture is totally neglected and during the last 15 years , over 2.5 lakh farmers committed suicide in India . Industries came up , but the plight of labourers did not improve,’ he noted .

Sivasankaran further said that after the death of Bharathi, only poet Bharathidasan and socialist Jeeva propagated his idealogy in Tamilnadu . After that none followed his steps.

Now the nation is facing several crisis. We cannot judge on what direction it is going. In this situation, we should think about creating a new world, new people, new culture on the basis of Bharathi’s ideology by involving youth as they are the future of this nation, ‘ he added.

Manonmaniam Sundaranar University former Vice Chancellor Dr.K.P.Aravanan, who handed over the award to Sivasankaran said that , ‘ T M C Raghunathan and N.Vanamamalai are great Tamil scholars and among them, Sivasankaran is the only one alive’

He hailed Sivasankaran for observing fast for two days when LTTE leader Prabhakaran and over 1.30 lakh tamils were killed in the civil war in Lanka out of deep disgust over the failure of those who spoke Tamil chauvinism in Tamilnadu to prevent such deaths.

Dinamani Editor Vaidyanathan , Collector V K Shanmugam , Industrialist S K M Mayilanandam, Historian Pulavar Raju and Peravai president T Stalin Gunasekaran spoke. Earlier, a rally carrying Bharathi Jothi was flagged off from public library in Karungalpalayam where Bharathi delivered his last speech.

Courtesy : The New Indian Express – Erode News Service

மீள்பார்வை ...

2011-12-19T06:11:00.000-08:00

- தி.க.சிவசங்கரன் -

( ' தி.க.சி .யின் நேர்காணல்கள் ' தொகுப்பிற்கு எழுதிய முன்னுரை )

கடந்த பிப்ரவரி 2011 உயிர் எழுத்து இலக்கிய இதழில் என்னுடைய நீண்ட நேர்காணலொன்றை எனது இனிய நண்பரும் , இளவலுமான படைப்பாளி வே.முத்துக்குமார் பதிவு செய்திருந்தார். இந்த நெடிய நேர்காணலினை துணிச்சலுடனும் , விருப்பத்துடனும் வெளியிட்ட உயிர் எழுத்து இதழாசிரியர் திரு.சுதீர் செந்தில் அவர்களின் சீரிய இலக்கியப் பணியைப் பாராட்டுகிறேன்; வாழ்த்துக்கிறேன் . இந்த நேர்காணலின் விளைவாக உருவான வரவேற்பும் , எதிர்வினையும் தான் , என்னுடைய இந்த ஒட்டுமொத்த நேர்காணல்களை தொகுக்க வேண்டும் என்கிற பேரார்வத்தையும் , உந்துசக்தியையும் நண்பர் வே.முத்துக்குமாருக்கு ஏற்படுத்தியிருக்க வேண்டும் . இன்றைய தமிழகத்தின் கலை இலக்கியச் சூழலில் இத்தகைய நேர்காணல்களின் தொகுப்பொன்று வெளிவருவது மிக அவசியமென்றும் அவர் கருதியிருக்கக் கூடும். இதன் தொடர்ச்சியாக , 1992 ஆம் ஆண்டிலிருந்து - மார்ச் 2011 ஆம் ஆண்டு வரையில் பல்வேறு தரப்பட்ட இதழ்களில் வெளியான சுமார் 26 நேர்காணல்களை கடந்த ஆறு மாத காலமாக கடின உழைப்புடன் தொகுத்துத் தந்திருக்கிறார். அவருக்கு என் வாழ்த்துக்கள் .

1942 ஆம் ஆண்டிலிருந்து எனது படைப்புகளும் , விமர்சனக் கட்டுரைகளும் இன்று வரையிலும் வெளிவந்து கொண்டிருக்கின்றன . சுமார் 69 ஆண்டுகால என்னுடைய இலக்கிய வாழ்க்கையின் நோக்கையும் , போக்கையும் சற்று திரும்பிப் பார்க்கிற போது நான் வருத்தப்பட ஏதுமில்லை என்றே தோன்றுகிறது .

1948 இல் புதுமைப்பித்தன் மறைவிற்கு பிறகு நானும் எனது நெருங்கிய நண்பர்களும் தமிழிலக்கிய வளர்ச்சியில் ஒரு புதிய மாற்றத்தை ஏற்படுத்த வேண்டுமென்றும் , அதை உலக இலக்கியத் தரத்துக்கு மேன்மேலும் இட்டுச் செல்ல வேண்டுமென்றும் கருதினோம் . பத்திரிக்கைத்துறையில் எங்களுக்குள்ள எளிய வாய்ப்புகளையும் , வசதிகளையும் தனியாகவும் , கூட்டாகவும் பயன்படுத்தினோம் . சிற்சில சிற்றேடுகளையும் நூல்களையும் கொண்டு வந்தோம் . நச்சிலக்கியங்களை அழிக்கவும் , நல்லியக்கியங்களை வளர்க்கவும் தமிழகமெங்கும் ஒரு பரந்து விரிந்த இயக்கம் தேவை என்றும் கருதினோம் . அந்த இயக்கத்தின் ஒரு துளியாக தான் நான் விளங்கினேன் . அதன் கூட்டு முயற்சிகளில் என்னால் இயன்ற வரையில் அன்று முதல் இன்று வரை பங்களித்து வருகிறேன் .

எங்களுடைய கூட்டு இயக்கத்தின் விளைவாக கடந்த அரை நூற்றாண்டு காலத்தில் பத்திரிக்கைத் துறையிலும் , பதிப்பகத்துறையிலும் ஆக்கப்பூர்வமான மாற்றங்களை காண முடிகிறது . அதோடு இன்றி , நாங்கள் வகுத்துக் கொண்ட லட்சியங்களை ஆதரிக்கும் அணி தலைமுறை தலைமுறையாக வளர்ந்து வருவதையும் நான் காண்கிறேன் .

புதிய மனிதனுக்காக - புதிய வாழ்க்கைக்காக - புதிய கலாச்சாரத்திற்காக , கலை, இலக்கியம் படைக்கப்பட வேண்டும் என்பதே எனது நோக்கம் . அந்த இலக்கியம் சமூக நலனுக்கும் , மனித நல்வாழ்வுக்கும் போராடுவதற்கு தேவையான உறுதியையும் நம்பிக்கையையும் அளிக்க வேண்டும் என்று நான் கருதுகிறேன் . மக்களின் நல்வாழ்வுக்கான போராட்டம் என்பது சமூக நீதிக்கான போராட்டமே என்று உணர்கிறேன் . இதிலிருந்து தமிழக படைப்பாளிகளும் , ஊடகத்துறையினரும் ஒதுங்கியோ , விலகியோ இருக்க முடியாது . இது வரலாற்று நியதியாகும் .

என்னுடைய இந்தக் கருத்துக்களை மையப்படுத்தி தான் இத்தொகுப்பிலுள்ள நேர்காணல்கள் அமைந்திருக்கின்றன . தொகுப்பின் பின்னிணைப்பாக எனது இலக்கிய ஆசான் வல்லிக்கண்ணன் அவர்களின் கருத்துரை இடம்பெற்றிருக்கிறது. என்னுடைய கருத்துகள் விவாதத்துக்குரியவைகளாக இருக்கலாம் . அவை ஆழ்ந்த புரிதலுடன் வாசிக்கப்பட்டு , விவாதிக்கப்பட வேண்டுமென்பதே எனது விருப்பம் . வாசகர்களின் அறிவு நாணயத்தின் மீது எனக்கு மிகுந்த நம்பிக்கை உண்டு . விவாதங்களின் மூலமாகவே நான் வளர்ந்து வந்திருக்கின்றேன் .

இத்தொகுப்புக்கு , தாயினும் சாலப் பரிவுடன் ஒரு அற்புதமான அணிந்துரை வழங்கியுள்ள , தமிழகத்தின் பெருமைக்குரிய படைப்பாளி தோழர்.பொன்னீலன் அவர்களுக்கு எனது நெஞ்சம் நிறைந்த நன்றி . எந்தவித பிரதிபலனையும் எதிர்பாராமல் , என்னுடைய லட்சியத்தை பரப்புவதற்கு துணை நிற்க வேண்டும் என்ற தெளிவுடனும் , உறுதியுடனும் இயங்கி வரும் உயிர் எழுத்து பதிப்பாசிரியர் திரு.சுதீர் செந்தில் அவர்களை எனது நண்பராக அடையப் பெற்றது பெரும்பேராகும் . அவரும் வே.முத்துக்குமாரும் இணைந்து முயன்றிராவிட்டால் இன்றைய காலகட்டத்தில் இந்நூல் வெளிவருவது சாத்தியமே அல்ல என்பதை நான் பதிவு செய்ய விரும்புகின்றேன் .

விருட்சத்தின் நிழலில் ...

2011-12-19T00:08:00.000-08:00

- வே. முத்துக்குமார் -

( தி.க.சி .யின் நேர்காணல்கள் தொகுப்பிற்கு எழுதிய உரை )

1986 ஆம் ஆண்டு க.நா.சு.க்கு சாகித்ய அகாதமி விருது அறிவிக்கப்பட்டவுடன் நண்பர்கள் சிலர் அவரை பாராட்டச் சென்றார்களாம். 'நீங்களெல்லாம் பாராட்டுவது இருக்கட்டும் . எனக்கு விருது அறிவிக்கப்பட்டதைப் பற்றி தி.க.சி என்ன சொல்கிறார் ? ' என்று நண்பர்களிடத்தில் கேட்டிருக்கிறார் க.நா.சு. தனக்கு விருது அறிவிக்கப்பட்டதை பற்றி , இலக்கியச் செயற்பாட்டாளர் என்ற முறையில் தி.க.சி.யினுடைய அபிப்பிராயத்தை அறிய ஆர்வம் காட்டியிருக்கிறார் க.நா.சு.

இலக்கியக் கோட்பாட்டு ரீதியாக இருவரும் மாறுபட்ட கருத்துக்களைக் கொண்டிருந்த போதிலும் , தான் நடத்திய 'இலக்கிய வட்டம்' இதழில் தி.க.சி.யினுடைய 'பதினேழு ஆண்டில் இலக்கியம்' மற்றும் 'அசுரகணத்துடன் போரிடுக' ஆகிய கட்டுரைகளை வாங்கிப் பிரசுரித்திருக்கிறார் க.நா.சு. அந்த அளவுக்கு இலக்கியத்தில் அப்போது ஜனநாயகம் இருந்தது .

இத்தகைய இலக்கிய ஜனநாயகமும் , அறிவு நாணயமும் தான் ஒரு படைப்பாளிக்கு தேவை என்பதனை தனது ஆரம்ப காலத்திலிருந்து இன்று வரையில் தொடர்ந்து வலியுறுத்தி வருகிறார் தி.க.சி .

தி.க.சி.யினுடைய தமிழை 'விமர்சனத்தமிழ்' என்று வர்ணித்திருக்கிறார் கவிஞர் மீரா. 1993 ஆம் ஆண்டு தி.க.சி.யினுடைய விமர்சனக் கட்டுரைகளைத் தொகுத்து நூலாக வெளிக்கொண்டு வரும் போது அதற்கு கவிஞர் மீரா வைத்த தலைப்பு 'விமர்சனத் தமிழ்' . 'இயற்றமிழ், இசைத்தமிழ், நாடகத்தமிழ் என்று தமிழைப் பகுத்து முத்தமிழ் என்கிறோம்.தமிழிலக்கியம் நான்காந்தரத்துக்கு தள்ளப்பட்டு விடக் கூடாது என்று தடுத்தாட் கொள்ளவே தமிழில் 'விமர்சனத் தமிழ்' வேண்டும். தமிழில் விமர்சனக்கலை இன்னும் வளரவில்லை என்ற வசையை தி.க.சி.யின் விமர்சனத் தமிழ் ஒழிக்கும் என நம்பலாம்' என்று தன் பதிப்புரையில் குறிப்பிட்டிருக்கிறார் கவிஞர் மீரா.

தி.க.சி ஒரு கற்பக விருட்சம் . அந்த விருட்சத்தின் நிழலில் ஒதுங்கிய எண்ணற்ற வாசகர்களில் நானும் ஒருவன் . என் படைப்பொன்றை பற்றிய அவரது விமர்சனக் கடிதத்தின் மூலமாக அந்த விருட்சத்தின் நட்பு கிட்டியது . இதன் தொடர்ச்சியாக நிகழ்ந்து கொண்டிருக்கிற எங்களது சந்திப்புகளினிடையே நிறைய விஷயங்களை என்னோடு பரிமாறியிருக்கிறார் தி.க.சி .

ஒரு மாதத்திற்கு முந்தைய சந்திப்பினூடே தி.க.சி என்னிடம் ஒரு கேள்வியைக் கேட்டார். 'உங்களுக்கு மனத்தடைகள் இருக்கிறதா, முத்துக்குமார்?' 'நிறைய இருக்கிறது' என்றேன். 'கவலைப்படாதீர்கள் . எனக்கும் மனத்தடைகள் இருக்கின்றன. உங்களுக்கும் எனக்கும் மட்டுமல்ல. நம்ம மகாகவிக்கும் மனத்தடைகள் இருந்திருக்கிறது ' என்று கூறி, பாரதியின் முத்துமாரி பாடலில் வருகிற 'துணிவெளுக்க மண்ணுண்டு/தோள்வெளுக்கச்சாம்பலுண்டு/மணிவெளுக்கச் சாணையுண்டு /மனம் வெளுக்க வழியில்லை' என்கிற வரிகளை சொல்லிக் காண்பித்தார். இதனைத் தொடர்ந்து 'Which will demolish the mental barriers ?' என இருபது நிமிடங்கள் என்னோடு உரையாடினார் .

ஒவ்வொரு முறையும் அவரை சந்தித்துத் திரும்பும் போது அவர் சொல்வது இது தான் . ' அப்ப , நாம இன்னைக்கு நல்ல விஷயங்களை பற்றி விவாதிச்சிருக்கோம் . நேரத்தை வீணா போக்கிடலை ' . தி.க.சி.க்கே உரிய இயல்பு இது .

கடந்த 21-02-2010 அன்று , குற்றாலத்தில் உலகத் தமிழ் சிற்றிதழ் சங்க மாநாடு நடைபெற்றது . இச்சங்கத்தின் மூலமாக இம்மாநாட்டில் தி.க.சி.க்கு ' பாரதி இலக்கிய விருது ' வழங்கப்பட்டது . இவ்விழாவில் கலந்து கொள்ள எனக்கும் அழைப்பு விடுத்திருந்தார் தி.க.சி . நீண்ட இடைவெளிக்குப் பிறகு தி.க.சி மேற்கொண்ட வெளியூர் பயணம் அது . எழுத்தாளர் கழனியூரன், ஒவியர் பொன் வள்ளிநாயகம் , தி.க.சியுடன் நானும் காரில் பயணமானேன் . ஒன்று சேர்ந்த பயணத்தின் போது தானே நண்பர்களால் நிறைய பேசிக் கொள்ள முடிகிறது.. கடந்து போன , நடந்து முடிந்த, மறந்து போன விஷயங்களையெல்லாம் அப்போது தானே நினைவுறுத்திக் கொள்கின்ற சந்தர்ப்ப்பம் கிடைக்கிறது. அப்படி தான் நாங்களும். சம்பந்தமில்லாமல் ஏதேதோ பேசிக் கொண்டே வந்தோம்.'அப்பலெல்லாம் இந்த கல்மண்டபம் மட்டும் தான் இருந்துச்சு . இவ்வளவு கடைகளெல்லாம் கிடையாது' எனச் செல்கின்ற வழியெல்லாம் ஆச்சரியப்பட்டுக் கொண்டே வந்தார் தி.க.சி . கார் ஆலங்குளத்தைத் தாண்டி அத்தியூத்தை ஒட்டியிருக்கின்ற தமிழூரை கடந்த போது , மூத்த தமிழறிஞரும், உலக தமிழராய்ச்சி நிறுவனத்தின் முன்னாள் இயக்குநருமான ச.வே.சுப்பிரமணியத்தின் (ச.வே.சு) வீட்டை அடையாளம் காட்டினார் எழுத்தாளர் கழனியூரன். ச.வே.சு.வை சந்திக்க வேண்டுமென தி.க.சி விருப்பம் தெரிவிக்க, அவரது வீட்டுக்குச் சென்றோம் . இடுப்பில் முழுநீள துண்டை மட்டுமே ஆடையாக அணிந்திருந்த ச.வே.சு, தி.க.சி.யைப் பார்த்தவுடன் உற்சாகமாகி வரவேற்றார். இன்னும் எழுத வேண்டியிருக்கின்ற விஷயங்கள், அன்றாட அரசியல் நாட்டு நடப்பு என இருவரும் அவர்களுக்கே உரிய பாணியில் உற்சாகமாக , நையாண்டியாக பேச, நண்பர்கள் நாங்கள் அவர்களது பேச்சை ரசித்துக் கேட்டுக் கொண்டிருந்தோம் .

குற்றாலத்தில் மாநாடு முடிந்து வீடு திரும்பும் போது இரவு நேரமாகி விட்டிருந்தது . நண்பர் வள்ளியிடமிருந்து அலைப்பேச்சு அழைப்பு வந்தது . தி.க.சி.யினுடைய கைப்பையை ( சில மாத்திரைகளும், முந்நூற்றி இருபது ரூபாய் பணமும் அதில் இருந்தன ) தவறுதலாக மாநாட்டு மண்டபத்தில் விடுபட்டு விட்டு வந்ததாக சொல்ல , அம்மாநாட்டின் அமைப்பாளர் ஒருவரை நான் தொடர்பு கொள்ள , அக்கைப்பை அங்கு இருப்பதாகவும் , இரண்டு நாளில் அதனை தி.க.சி.யிடம் சேர்த்து விடுவதாகவும் தெரிவித்தார். ஒரு வார காலத்தில் கைப்பை தி.க.சி. வசம் வந்து சேர்ந்தது . பையினுள் மாத்திரைகள் மட்டும் இருந்தன . பணம் இல்லை . இச்சம்பவத்தைப் பற்றி தி.க.சி பெரிதாக அலட்டிக் கொள்ளவில்லை . ' நம்மளூடைய பணம் யாரோ ஒரு முகம் தெரியாத இலக்கிய நண்பருக்கு உதவியிருக்கிறது . என்னுடைய ஆதங்கமெல்லாம் கைப்பையில் கொஞ்சம் கூடுதலாக பணம் வச்சிருந்தால் அந்த நண்பரின் தேவைகள் ஒரளவுக்கு தீர்த்திருக்குமே ' என்றார்

இவர் தான் தி.க.சி !

எழுத்தாளர்களை எழுதும் எழுத்தாளர் !

2011-12-18T06:46:00.000-08:00

- பொன்னீலன் -

( டிசம்பர் 2011 இல் உயிர் எழுத்து பதிப்பகம் வெளியிடயிருக்கும் ' தி.க.சி .யின் நேர்காணல்கள் ' தொகுப்பிற்கு நாவலாசிரியர் திரு.பொன்னீலன் அவர்கள் வழங்கியுள்ள அணிந்துரை )

சென்ற நூற்றாண்டின் நடுப்பகுதியில் வடிவும் , பொலிவும் , வேகமும் பெற்ற மக்கள் இலக்கிய பேரெழுச்சியின் வீரியமிக்க மூத்த சுடர்களில் ஒன்றாக இன்றும் நம்மிடையே ஒளி வீசிக் கொண்டிருப்பவர் தி.க.சிவசங்கரன் அவர்கள் . சிறுகதையாளராக , கையெழுத்து இதழ் ஆசிரியராக , மொழிபெயர்ப்பாளராக , திரைப்பட விமர்சகராக , நடைச்சித்திரக்காரராக , இலக்கிய விமர்சகராக , இதழாசிரியராக ... இப்படி ஒரு புறமும் , இளைஞர் பெருமன்ற உறுப்பினராக , நெல்லை இலக்கியக் கழக நிறுவனர்களில் ஒருவராக , தமிழ்நாடு கலை இலக்கியப் பெருமன்றத் தலைவர்களில் ஒருவராக , முற்போக்கு எழுத்தாளர் சங்க வழிகாட்டிகளில் ஒருவராக , இளம் படைப்பாளர்களைத் தட்டிக் கொடுத்து வளர்க்கும் தாயாக ... இப்படி இன்னொரு புறமுமாக இன்று வரை எந்தச் சோர்வும் இன்றிச் செயல்பட்டு வருபவர் இவர் . இவர் இயல்பில் அமைந்து விட்ட பண்புகள் இவை .

இடதுசாரி அரசியலோடு கிட்டத்தட்ட எழுபது ஆண்டுகள் இடையறாத தொடர்பு உடையவர் இவர் . மனித சமூக சமத்துவத்திலும் , சகோதரத்துவத்திலும் , ஜனநாயக அறத்திலும் பிசகில்லாப் பிடிப்புடையவர் . அரசியலுக்காக நல்லிலக்கியத்தையோ , நல்லிலக்கியத்துக்காக அரசியலையோ ஒரு போதும் காவு கொடுக்காதவர். ஒரே வரியில் சொன்னால் , ஜீவாவின் வழியில் விலகலின்றி நடப்பவர் . அரசியலில் இன்றைய ஜீவா , இரா.நல்லகண்ணு என்றால் , இலக்கியத்தில் இன்றைய ஜீவா தி.க.சி. தான் .

இந்த தி.க.சி.யை ஆர்வத்தோடு நேர்கண்டு நேர்மையாய்ப் பதிவு செய்தவர்கள் மிகப் பலர் . அவர்களில் 1992- லிருந்து தொடங்கி , இன்று வரை பதிவு செய்யப்பட்ட கிட்டத்தட்ட இருபத்தைந்து நேர்காணல்கள் , இத்தொகுப்பில் காலவரிசையில் அடுக்கப்பட்டுள்ளன . இந்த நேர்காணல்களினுள்ளே பயணம் செய்பவருக்குத் தி.க.சி என்னும் ஆளுமையின் இலக்கிய வரலாற்றைத் தெரிந்து கொள்ள முடிகிறது . கிட்டத்தட்ட 75 ஆண்டுகால முற்போக்கு இலக்கிய வரலாற்றையும் , விமர்சனப் போக்குகளையும் புரிந்து கொள்ள முடிகிறது . இலக்கியக் கருத்து நிலைப் போக்குகளைக் கூட ஒரளவுக்குப் புரிந்து கொள்ள முடிகிறது . அரசியல் வரலாற்றையும் அடி நீரோட்டமாகத் தெரிந்து கொள்ள முடிகிறது . ஒரு வகையில் இது கடந்த எழுபது எழுபத்தைந்து ஆண்டு கால முற்போக்கு இலக்கிய உலகச்சித்திரம் .

வல்லிக்கண்ணனால் உருவாக்கப்பட்டவர் தி.க.சி. அண்ணாச்சி சிந்துபூந்துறை சண்முகம் பிள்ளை , ஜீவா, ரகுநாதன் , நா.வானமாமலை முதலியோரால் ஊட்டி வளர்க்கப்பட்டவர் . இயல்பாகவே அவருக்குள்ளிருந்த மனிதநேயம் இந்த ஆளுமைகளின் தாக்கங்களாலும் , அன்றைய சுற்றுசூழல்களின் பாதிப்புகளாலும் வலுவேற்றப்பட்டு , இன்றைய தி.க.சி என்னும் ஆளுமையாக உருப்பெற்றிருக்கிறது .

சின்னஞ் சிறியவனாகப் பத்து வயதில் தன் தாயாரின் ஊர் அரியநாயகிபுரத்துக்குச் சென்ற போது , கோயில் சுவரில் எழுதிப் போடப்பட்ட ' சூத்திரன் என்று சொன்னால் , ஆத்திரத்துடன் அடி ' என்னும் வாசகம் அவரைத் திகைப்படைய வைத்திருக்கிறது . பொங்கல் நேரத்தில் , தற்செயலாகக் காண நேர்ந்த சுதந்திரச்சங்கு இதழில்,

' பிச்சைதா என்று கெஞ்சும் குரலும்

பிடி இந்த என்று நீளும் கரமும்

இச்செகத்தில் இல்லாத நாளே

இன்பநாள் என்று கூறிடுவோமே '

எனச் சங்கு சுப்பிரமணியம் எழுதியக் கவிதை இவருக்குள் சமூகத் தேடலை ஏற்படுத்தியிருக்கிறது . எத்தனை ஆயிரம் பேர் இந்த வாசகத்தையும் கவிதையும் படித்திருப்பார்கள் . எல்லோரும் இப்படி உருவானார்களா ? மிக இளமையிலேயே தி.க.சி.யினுள் அமைந்திருந்த மனிதநேயத்தை நினைக்கும் போது வியப்பாக இருக்கிறது .

இப்படி இளமையில் தூண்டப்பட்டு பொதுவாழ்க்கைக்கு வரும் பலர் , இடையில் சுருண்டு போவதைப் பார்க்கிறோம் . சாதி, சமயம் என்றும் , பணம் , புகழ் என்றும் சோரம் போய் விடுவதையும் பார்க்கிறோம் . 87 வயதாகியும் வீரியம் சற்றும் குறையாத , லட்சிய ஒளி சற்றும் மங்காத , ஊசலாட்டம் துளியும் இல்லாத தி.க.சி ' வாழும் மனச்சாட்சியின் ஒளி மிக்கக் காட்சி ' . அவர் வீட்டுக்குச் சென்று , அவரைச் சந்திப்பது நம்மை ஆற்றல்படுத்தும் ஒரு இனிய அனுபவம் . ' வாங்க ... வாங்க ... ' என்று முகம் மலர்ந்திடும் அவர், மறுகணமே அந்தப் பத்திரிக்கையில் மூன்றாம் கட்டுரையைப் படித்தீர்களா ? இந்தப் பிரச்சினையில் உங்கள் கருத்து என்ன என ஏன் இன்னும் பதிவு செய்யவில்லை ? என்றெல்லாம் கேள்விகளை அடுக்கிக் கொண்டே போவார் . இப்போது என்ன செய்து கொண்டிருக்கிறீர்களென்றும் ஆர்வத்தோடு கேட்பார் . சில முக்கியமான கட்டுரைகளின் பக்கங்களைத் தந்து உடனே படிக்கச் சொல்லுவார்.

அவரைத் திட்டுவதற்கென்றே தமிழகத்தில் வாழையடி வாழையாக ஒரு திருக்கூட்டம் வளர்ந்து கொண்டிருக்கிறது . கொச்சையாகத் திட்டுவார்கள் . குத்தல் கதைகளைக் கட்டிப் பரவ விடுவார்கள் . பேராச்சரியமாக இருக்கும் , அவர்கள் யாரைப் பற்றியும் கசப்போடு ஒரு வார்த்தை கூட தி.க.சி வாயிலிருந்து வராது . இது மாதிரியான பெருமிதப் பண்புடைய இன்னும் ஒரு பெரியவர் பேராசிரியர் எஸ்.தோத்தாத்ரி . வேடிக்கை என்னவென்றால் , தி.க.சியை எப்போதும் கிண்டல் செய்கின்ற மூத்தவர் ஒருவருக்கு சாகித்ய அகாதமி விருது வழங்குவதற்காக பலரிடம் போன் வழியே அவர் தொடர்பு கொண்டதை நேரில் பார்த்துக் கொண்டிருந்தேன் . தி.க.சி.யின் மனவிசாலம் அத்தனை எல்லையற்றது .

இந்த நூலைப் படிப்போருக்கு , அவருடைய லட்சியங்களைப் புரிந்து கொள்ள முடியும் . அவரே சொல்கிறார் .

' நான் ஒரு எளிய தோட்டக்காரன் . எல்லாச் செடிகளுக்கும் தண்ணீர் பாய்ச்சுவேன் . மலர்கின்ற செடி மலரட்டும் . எந்தச் செடியும் கருக எனக்கு மனம் இடம் தராது . நிறைய படைப்பாளிகளை உருவாக்குவதே எனது நோக்கம் '

நான் அவரை இப்படிச் சொல்வேன் . ' தி.க.சி ஒரு இலக்கிய மழை . இலக்கிய நிலத்தைக் குளிர்விக்கும் அன்புமழை . வளர்வதும் , வளராததும் , நல்ல பலன் தருவதும் , தீய பலன் தருவதும் , சமூகத்தால் கொண்டாடப்படுவதும் , புறக்கணிக்கப்படுவதும் செடிகளின் பிரச்சினை '

கந்தர்வன் , பூமணி , பிரபஞ்சன் , பா.செயப்பிரகாசம் என ஒரு வீரியமிக்க எழுத்தாளர் படையையே உருவாக்கி வளர்த்தவர் இவர்.

என்னுடைய ' ஊற்றில் மலர்ந்தது ' கதையும் அவர் காலத்தில் தான் ' தாமரை ' யில் வெளிவந்தது என்பதை நான் மகிழ்ச்சியோடு குறிப்பிட வேண்டும் . அந்தக் கதை பற்றி ஆரம்பத்தில் அவருக்கும் பேராசிரியர் நா.வானமாமலைக்கும் இடையில் கருத்து வேறுபாடு இருந்தது என்பது உண்மை தான் . ஆனால் அந்தக் கதை வெளிவந்து பாராட்டப்பட்டதும், அவரே அடுத்த கதையை என்னிடம் கேட்டுப் பெற்று 'கண்ணதாசன்' இதழுக்கு அனுப்பி வைத்து , என்னை உற்சாகப்படுத்தினார் . இப்படி அவர் உற்சாகப்படுத்தி வளர்த்த இன்னும் பலரைப் பட்டியலிட முடியும் .

பல சிறப்பான செய்திகளை இந்தப் புத்தகத்தினுள்ளே நீங்கள் கண்டு கொள்ளலாம், ' வீரவணக்கம் வேண்டாம் ' எனப் புதுமைப்பித்தன் விஷயத்தில் வாசகர்களை எச்சரித்த அதே தி.க.சி, புதுமைப்பித்தன் படைப்புகளின் மீது எத்தகைய ஆழ்ந்த ஈடுபாடு கொண்டிருக்கிறார் என்பதைப் புரிந்து கொள்ள முடியும் . இலக்கியக் கோட்பாடுகளை ஒன்றன் பின் ஒன்றாக வரிசைப்படுத்தி , ஒன்றின் சாவில் இன்னொன்று மலர்வது போல ஒரு மாய தோற்றத்தை உருவாக்கும் விவரம் தெரியாத இளம் படைப்பாளிகளை , ' இசங்களின் காலத்தை இப்படியெல்லாம் திட்டவட்டமாகப் பிரிக்க முடியாது . ஒரே காலத்தில் பல வித இலக்கியப் போக்குகள் இருந்தன , இருக்கின்றன என்பதை மறந்து விடக் கூடாது ' என அவர் எச்சரிக்கிறார் . இலக்கியத்தில் அழகியல் , அறவியல் , அறிவியல் மூன்றும் வேண்டுமென வற்புறுத்துகிறார் . ' கூச் பீகாரில் கொலையுண்ட குமரிக்கு ' என்னும் அற்புதமான கவிதையை எழுதிய ரகுநாதனே அதை மறந்து விட்ட செய்தியை இந்நூலில் படித்துப் பரவசமடைய முடிகிறது . ' தமிழ் ஒளி தீவிரவாதி . அவர் கவிதைகளில் தீயின் ஜொலிப்பும் , கொழுந்துகளும் , சொல்லாட்சியும் , அழுத்தமும் அதிகம் இருக்கும் . விதவிதமான சந்தங்கள் துள்ளும் ' என மின்னும் வரிகளில் அவருடைய இலக்கிய ஆற்றலின் துளியை ருசிக்க முடியும் .

இந்த நூலைத் தொகுத்த வே.முத்துக்குமார் பற்றியும் சொல்ல வேண்டும் . சில ஆண்டுகளுக்கு முன் நான் ரயிலில் ஊருக்கு வந்து கொண்டிருந்த போது , இளைஞர் ஒருவர் என்னிடம் உரையாட வந்தார் . நிறையப் பேசினோம் , நெல்லையில் பிரிய நேர்கையில் அவர் தன் முகவரியைத் தந்தார் . அதன் பின் கிட்டத்தட்ட இரண்டாண்டுகாலம் கடிதத் தொடர்பு எங்களுக்குள்ளே இருந்தது . பிறகு எப்படியோ நின்று போனது .

இப்போது , இந்த நூல் எனக்கு அனுப்பப்பட்ட போது , அதில் அவர் பெயர் இருந்தது கண்டு ஆச்சரியப்பட்டேன் . இவருடைய இலக்கிய ஈடுபாட்டை உணர்ந்து கொள்ளாமலிருந்து விட்டோமே என்ற குற்ற உணர்வு தோன்றியது . உயிர் எழுத்தில் ' இலக்கியத் தந்தை ' என்ற தலைப்பிட்டு அவர் பதிவு செய்திருந்த நேர்காணல் அவருடைய இலக்கிய ஆழத்தை எனக்கு உணர்த்திற்று . அவரே இந்த நூலைத் தொகுத்திருப்பது மிகுந்த மகிழ்ச்சியளிக்கிறது .

தி.க.சி.யை அஞ்சலட்டை எழுத்தாளர் எனச் சிலர் கேலி செய்கிறார்கள் . முகவரி அச்சிட்ட பளபளக்கும் காகிதத்தில் கடிதமெழுதி , அஞ்சு ரூபாய் முத்திரை ஒட்டிய உறையில் அனுப்பிப் பணத்தை வீணடிக்க அவர் மனம் ஒப்பாது . அந்த ஐந்து ரூபாய்க்குப் பத்துக் கடிதம் எழுதி , பத்து இளைஞர்களை உற்சாகப்படுத்தலாமே என எண்ணுவார் . வ.க. அவரிடம் ஏற்படுத்தியிருக்கும் தாக்கம் இது . மூதறிஞர் ராஜாஜியும் , இலக்கிய மேதை ஜீவாவும் , இலக்கிய பீஷ்மர் வ.க.வும் , டாக்டர் மு,வ.வும் , காலம் முழுவதும் அஞ்சல் அட்டை பயன்படுத்தியவர்கள் என்பதைத் தெரிந்து கொள்பவர்களுக்கு , அஞ்சலட்டையின் சிறப்பு நிச்சயம் புரியும் .

அவர் பெரிய நூல்கள் அதிகம் எழுதவில்லையே என்று ஏளனமாகப் பேசியிருக்கிறார்கள் சிலர் . அவர் ஆற்றலை புரியாதவர்கள் அவர்கள் . அவர் பெரிய புத்தகங்களை உருவாக்காமல் இருக்கலாம் . அவர் பெரிய எழுத்தாளர்களை உருவாக்கியிருக்கிறாரே ! எழுத்தாளர்களை எழுதிய எழுத்தாளர் அவர் என்னும் பேருண்மையை அவர்கள் புரிந்து கொள்ள வேண்டும் . ஆம் , எழுத்தாளர்களை எழுதும் எழுத்தாளர் அவர் என்பதை அவர்கள் உணர்ந்து கொள்ள வேண்டும் .

பாரதியின் பணிகளைத் தொடர இளைஞர்களைத் திரட்ட வேண்டும் : தி.க.சி. வலியுறுத்தல்

2011-12-11T22:52:00.000-08:00

ஈரோட்டில் ஞாயிற்றுக்கிழமை நடைபெற்ற பாரதி விழாவில், பாரதி விருதினை முன்னாள் துணைவேந்தர் க.ப.அறவாணன் வழங்க, பெற்றுக் கொள்கிறார் எழுத்தாளர் தி.க.சி

பாரதியின் பணிகளைத் தொடர இளைஞர்களைத் திரட்ட வேண்டும் என்று, சாகித்ய அகாதெமி விருது பெற்ற எழுத்தாளர் தி.க.சி பேசினார்.

ஈரோடு மக்கள் சிந்தனைப் பேரவை சார்பில் ஞாயிற்றுக்கிழமை நடைபெற்ற பாரதி விழாவில் எழுத்தாளர் தி.க.சிவசங்கரனுக்கு "பாரதி விருது' வழங்கப்பட்டது. மனோன்மணியம் சுந்தரனார் பல்கலைக்கழக முன்னாள் துணைவேந்தர் க.ப.அறவாணன் விருதை வழங்கினார்.

பாரதி விருது பெற்ற தி.க.சி ஆற்றிய ஏற்புரை:

பதினோரு வயதிலிருந்து பாரதி நூல்களைப் படித்து அதிலேயே மூழ்கியிருக்கிறேன். எனக்குக் கொடுத்துள்ள அடைமொழிகள், பாராட்டுகள் அனைத்தும் பாரதி போட்ட பிச்சை. இளமையிலேயே தாய், தந்தையை இழந்த என்னை வேறு எந்த வழியிலும் செல்லாமல் தடுத்தாட்கொண்ட தம்பிரானாக இருந்தவர் பாரதி. குருவாக, தாயாக, தந்தையாக என்னை வழிநடத்தியவை அவரது நூல்கள்.

இன்றைய இளைஞர்களை கல்வி, ஊடகம் போன்றவற்றில் நெறிப்படுத்தும் பணியில் தன்னலமின்றி ஈடுபட்டுள்ளதால் மட்டுமே மக்கள் சிந்தனைப் பேரவை புகழ் பெற்றுள்ளது.

பாரதி தனது கடைசிப்பேச்சில் இந்தியாவின் எதிர்காலம் குறித்தே அதிகம் பேசியுள்ளார். ஆனால் நாட்டின் வளர்ச்சி, எதிர்காலம் குறித்து சிந்திப்பவர்கள் தற்போது மிகக் குறைவாகவே உள்ளனர். நாட்டில் ஏழைகளும் அடிமைகளும் இல்லாத நிலை வேண்டும் என்று பாரதி கனவு கண்டார். அவர் பாடி 90 ஆண்டுகளுக்குப் பின்னரும் 80 சதவீதம் மக்கள் ஏழைகளாகவே உள்ளனர்.

உழவுக்கும் தொழிலுக்கும் வந்தனை செய்வோம் என்ற பாரதியின் வரிகளுக்கு மாறான நிலை இப்போது காணப்படுகிறது. நாட்டில் சுமார் 2.5 லட்சம் விவசாயிகள் தற்கொலை செய்து கொண்டுள்ளனர்.

தொழில் வளர்ச்சியும் பாதிக்கப்பட்டுள்ளது. இதற்கு மாற்றுத் திட்டத்தை அடையாளம் காண வேண்டும். பாரதிக்குப் பிறகு, அவரது நெறிகளைக் கடைபிடித்தவர்கள் பாரதிதாசனும், ஜீவாவும். அவர்கள், பாரதி எனும் கொடியில் பூத்த இரு மலர்கள். தமிழ்ச் சமுதாயம் மாற்றம் பெற பாரதியின் வழியில் வந்த பாரதிதாசனும் ஜீவாவும் முக்கியப் பங்கு வகித்துள்ளனர். பாரதிக்குப் பிறகு 40 ஆண்டுகள் வாழ்ந்த இவர்கள் தமிழ்ச் சமுதாயத்துக்கு பெரும் சேவை ஆற்றியுள்ளனர்.

இவர்களுக்குப் பிறகு ஏற்பட்ட காலியிடத்தை நிரப்ப ஆயிரம் பேர் வேண்டும். இப்போதைய காலகட்டத்தில் பாரதியின் பணிகளைத் தொடர வேண்டியது அவசியமாக இருக்கிறது. இளைஞர்களைத் திரட்டாமல் எந்த ஒரு சாதனையையும் படைக்க முடியாது. பாரதிதாசன், ஜீவா விட்டுச்சென்ற வெற்றிடத்தை இளைஞர்களைத் திரட்டுவதாலேயே பூர்த்தி செய்ய முடியும். இப்பணியை மக்கள் சிந்தனைப் பேரவை முன்னெடுத்துச் செல்ல வேண்டும்.

கடந்த 20 ஆண்டுகளில் உலகம் எந்த அளவுக்கு மாறியுள்ளது என்பதை அறிவோம். நாடு இப்போதுள்ள நிலையில் "புதியதோர் உலகம் செய்வோம்' எனும் பாரதியின் வரிகள் இளைஞர்களிடம் சென்றுசேர வேண்டும். இதன் மூலம் புதிய உலகம், புதிய வாழ்க்கை, புதிய பண்பாடு, புதிய சமுதாயம் படைக்கப்பட வேண்டும்.

இதில், ஊடகங்களின் பங்களிப்பு மிகவும் அவசியம். ஊடகங்கள் நினைத்தால் புதிய சமுதாயத்தை உருவாக்க முடியும். நல்ல செய்திகளை மக்களுக்குக் கொண்டு சென்று சமூக மாற்றத்தை ஏற்படுத்தவும் முடியும் என்றார் தி.க.சி.

ஈரோடு மாவட்ட ஆட்சியர் வே.க.சண்முகம் தலைமை வகித்தார். தினமணி ஆசிரியர் கே.வைத்தியநாதன் விழா உரையாற்றினார். புலவர் வே.ரா.தெய்வசிகாமணி கவுண்டர் உருவப் படத்தை கல்வெட்டியல் அறிஞர் செ.ராசு திறந்து வைத்தார்.

தேசிய நல விழிப்புணர்வு இயக்கத்தின் தலைவர் எஸ்கேஎம்.மயிலானந்தன், மக்கள் சிந்தனைப் பேரவைத் தலைவர் த.ஸ்டாலின் குணசேகரன், செயலர் க.நா.பாலன், பொருளாளர் என்.பழனிசாமி ஆகியோர் பேசினர்.

நன்றி : தினமணி நாளிதழ் - 12 .11 .2011

தி.க.சிக்கு பாரதி விருது!

2011-12-09T21:36:00.000-08:00

படைப்பாளர், இதழாளர், திறனாய்வாளர் போன்ற பன்முகச் செயல்பாட்டாளரான தி.க.சி என்று அழைக்கப்படும் தி.க.சிவசங்கரனுக்கு மக்கள் சிந்தனைப் பேரவை சார்பில் இந்த ஆண்டுக்கான பாரதி விருது வழங்கப்படுகிறது. தினமணி ஆசிரியர் கே.வைத்தியநாதன், விழாப் பேருரையாற்றுகிறார்.

விழா குறித்து மக்கள் சிந்தனைப் பேரவை தலைவர் த.ஸ்டாலின் குணசேகரன் கூறியது:

மக்கள் சிந்தனைப்பேரவை கடந்த 13 ஆண்டுகளாக பாரதி விழாவை நடத்தி வருகிறது. இதனை ஒரு விழா என்று கருதாமல் உணர்வுப் பூர்வமான விழாவாக நடத்தப்பட்டு வருகிறது. பாரதி பிறந்த நாளான டிசம்பர் 11ம் தேதி மாநில அளவில் விழா நடத்தப்பட்டு, சமூக மாற்றத்திற்கு வித்திட்டவர்களுக்கு பாரதி விருது வழங்கப்பட்டு வருகிறது.

கடந்த 1998 முதல் 2010ம் ஆண்டு வரை 13 பேருக்கு இந்த விருது வழங்கப்பட்டுள்ளது. ஈரோடு கொங்கு கலையரங்கில் வரும் 11ம் தேதி மாலை 6 மணிக்கு பாரதி விழா நடைபெறவுள்ளது. இந்த ஆண்டிற்கான பாரதி விருது படைப்பாளர், இதழாளர், திறனாய்வாளர் என்ற பன்முகச் செயல்பாட்டாளரான மூத்த படைப்பாளி தி.க.சி என்று அன்போடு அழைக்கப்படும் தி.க.சிவசங்கரனுக்கு வழங்கப்படுகிறது.

விழாவிற்கு, மாவட்ட ஆட்சியர் வே.க.சண்முகம் தலைமை வகிக்கிறார். பாரத ஜோதி பேரணி: தொடக்க நிகழ்வாக, கருங்கல்பாளையம் பாரதி நூலகத்தில் இருந்து தொடங்கும் பாரதி ஜோதி பேரணியை முனைவர் தாயம்மாள் அறவாணன் தொடங்கிவைக்கிறார். பெரும் புலவர் வே.ரா.தெய்வசிகாமணிக் கவுண்டர் உருவப் படத்தை கல்வெட்டியல் அறிஞர் புலவர் செ.ராசு திறந்துவைக்கிறார்.

கட்டுரைப் போட்டியில் வெற்றி பெற்ற மாணவர்களுக்குப் பரிசு வழங்கி தேசிய நல விழிப்புணர்வு இயக்கத் தலைவர் எஸ்கேஎம்.மயிலானந்தன் பேசுகிறார். மனோன்மணியம் சுந்தரனார் பல்கலைக்கழக முன்னாள் துணைவேந்தர் முனைவர் க.ப.அறவாணன், தி.க.சிக்கு பாரதி விருதை வழங்குகிறார். பாரதி ஜோதியை பெற்றுக்கொண்டு தி.க.சி ஏற்புரையாற்றுகிறார்.

தினமணி ஆசிரியர் கே.வைத்தியநாதன் விழாப் பேருரையாற்றுகிறார்

நன்றி : தினமணி நாளிதழ் - 10 .12 .2011 - ஈரோடு பதிப்பு

கடித இலக்கியம்

2011-12-08T22:27:00.000-08:00

( நாவலாசிரியர் பொன்னீலன் எழுதிய கடிதம் )

27.11.2011

அன்புமிக்கத் தோழர் அவர்களுக்கு,

வணக்கம் . தங்கள் அன்பான கடிதம் கிடைத்தது . பல்வேறு வித நோய்களால் பாதிக்கப்பட்ட உங்கள் உடம்பை 'தேய்புரிப் பழங்கயிறு'டன் ஒப்பிட்டு இருப்பது , ஒருபுறம் நோயின் கொடுமையை உணர்த்த , மறுபுறம் உங்கள் இலக்கியத் ஆழத்தை உணர்த்துகிறது . உங்கள் உள்ளம் இருக்கிறதே , அது ஒரு வைர ஊசி . உங்களை நிமிர்ந்து நிற்கச் செய்யும். தமிழகத்தின் சமூகச் சார்புள்ள அத்தனை பேருக்கும் நீங்கள் முன்னோடி , வழிகாட்டி . பயன்தரும் உங்கள் வாழ்வு நூறாண்டுகளைக் கடந்து சாதனை புரியும் .

தங்கள் நேர்காணல் தொகுப்பு உங்களைப் பற்றிய முழுப்படைபிடிப்பு. திரும்பத் திரும்ப வரும் பகுதிகளைச் சுருக்கி , முத்துக்குமார் அவர்கள் நிச்சயம் சிறப்பாக வடிவமைப்பார் . ஒரு அற்புத ஆவணமாக அது தமிழுக்கு கிடைக்கும் . உயிர் எழுத்து இதை வெளியிடுவது இரட்டிப்பு மகிழ்ச்சி . இளைஞர்களை நூல் விரிவாகச் சென்றடையும் . வெளியீட்டு விழாவில் கலந்து கொள்ள முடியும் என நம்புகிறேன் .

அருமைத் தோழர் ஸடாலின் அவர்கள் மிகச் சிறப்பாகத் தமிழ்த்தொண்டு செய்து வருகிறார் . மகாகவி பாரதி விருது உங்களுக்கு எப்போதோ தந்திருக்க வேண்டும் . பிந்திப் போய்விட்டது எனத் தோன்றுகிறது . என்றாலும் மிகுந்த மகிழ்ச்சி . கவனமாகப் பயணம் செய்யுங்கள் . காரில் கவனமாக அழைத்துச் செல்லுவார். ஒரு இளைஞர் உங்களுடன் இருக்கட்டும் . அந்த நாளில் எட்டையபுரத்தில் நூறு குழந்தைகளின் கவிதை நிகழ்ச்சி நடைபெற இருக்கிறது . தொடங்கி வைக்க நான் போக வேண்டும் . ஈரோடு வர வாய்ப்பில்லை .

என் அணிந்துரை உங்களுக்கு மகிழ்ச்சி அளித்ததில் எனக்கும் மகிழ்ச்சி . வாசகர்கள் உங்கள் ஆளுமையை ஆழமாக உணர வேண்டும் என்ற ஆசை.

அன்புடன்,

பொன்னீலன்

சீரிய இதழியல் அறநெறி

2011-11-28T20:43:00.000-08:00

( தினமணி - 28.11.2011 நாளிதழில் வெளியான தி.க.சி.யின் கடிதம் )

' பத்து பேர் தொண்ணூறு பேர் சாவதா ?' கட்டுரை படித்தேன் . ' வால் தெருவைக் கைப்பற்றுவோம் !' எனும் போராட்டத்தின் முக்கிய நோக்கையும் போக்கையும் , தமிழ் மக்கள் அனைவரும் நன்கு புரிந்து கொள்ளும் வகையில் , மிக எளிய , இனிய தமிழில் , இன்றைய தமிழக நிலவரத்தையும் இந்தியச் சூழ்நிலையையும் ஒப்புநோக்கி கட்டுரையாளர் சரியான சர்வதேசியக் கண்ணோட்டத்துடன் சிந்தனை மணிகளை வழங்கியுள்ளார் . ' வால் தெருவைக் கைப்பற்றுவது என்பதன் பொருள் சுரண்டலை ஒழிப்பது என்பது தான்; பத்துப் பேர் வாழத் தொண்ணூறு பேர் சாவதா?' எனும் கட்டுரையாளரின் இறுதி வரிகள் , வாசகர் நெஞ்சில் எப்போதும் எதிரொலித்துக் கொண்டேயிருக்கும் .

இதில் குறிப்பிடத்தக்க செய்தி என்னவெனில், 'அமெரிக்கா எவ்வழி, நாமும் அவ்வழி' எனும் தலையங்கத்தின் எதிரொலியாக , தினமணியில் பழ.கருப்பையா கட்டுரை அமைந்து இருப்பது தான் . 'பத்துப் பேர் வாழத் தொண்ணூறு பேர் சாவதா?' எனும் அமெரிக்க ஏழை, எளிய, நடுத்தர மக்களின் கேள்வி , பெரும்பாலான இந்திய , தமிழக மக்களின் இன்றைய வாழ்நிலைக்கும் மிகப் பொருத்தமாக உள்ளது அல்லவா ? இத்தகைய கேள்விகளைத் தூண்டும் கட்டுரைகளை வெளியிடுதல் , சீரிய இதழியல் அறநெறியாகும் .

நன்றி : தினமணி நாளிதழ் - 28 .11 .2011

தமிழில் ஒரு மகாகவி உருவாகாமல் தடை செய்த பொறுப்பு தி.க.சி.க்குத் தான் !

2011-11-28T01:04:00.000-08:00

( டி.செல்வராஜ் . இந்திய விடுதலைக்கு முன்பிருந்தே எழுத்துலகில் இடம்பெற்ற ஒரு முதிர்ந்த முன்னோடியான படைப்பாளி . மலரும் சருகும் , தேநீர் , தோல் போன்ற புதினங்களை படைத்துள்ள இவர் , 'புதிய புத்தகம் பேசுது' இதழுக்கு அளித்த நேர்காணலிருந்து சில பகுதிகள் )

? எப்போது எழுதத் தொடங்கினீர்கள் ? முதல் கதை எது ? எப்போது பிரசுரமானது ?

என் முதல் கதை - அது பிரசுரமான இதழ் பற்றிய விவரம் இப்போது என் நினைவிற்கு வரவில்லை . ஆனால் மிக ஆரம்பநாட்களில் நான் எழுதிய இரண்டு சிறுகதைகள் பற்றி நன்றாக ஞாபகமிருக்கிறது . இந்திய விவசாயிகள் போராட்டத்தில் ஒரு சிறப்புமிக்க சந்தால் பழங்குடியின மக்கள் போராட்டம் பற்றிய கதை ஒன்று ; மற்றொன்று - அப்போது நடைபெற்ற ஆசிரியர்கள் போராட்டம் பற்றியது - தி.க.சி.யும் , தொ.மு.சி.ரகுநாதனும் இந்த இரண்டையும் படித்து ஒப்புதல் தந்தார்கள் . பத்திரிக்கைக்கும் அனுப்பினார்கள் . இரண்டும் ஜனசக்தியில் வெளியாகின .

? கவிதைகள் எழுதியதுண்டா ?

( பலத்த சிரிப்புடன் ) மாணவனாக இருந்த போது கவிதைகள் எழுதியதுண்டு . அவற்றை தி.க.சி.யிடம் கொடுத்து அபிப்ராயம் கேட்டேன் . அவர் ஒரே வாக்கியத்தில் சொன்னார் . ' டி.எஸ.நீங்க சிறுகதைகள் மட்டுமே எழுதுங்கள் !' என்று . அதோடு கவிதை எழுதுவதை நிறுத்தி விட்டேன் . எனவே தமிழில் ஒரு மகாகவி கவிதை எழுதுவதை நிறுத்தி விட்டேன் . தமிழில் ஒரு மகாகவி உருவாகாமல் தடை செய்த பொறுப்பு தி.க.சி.க்குத் தான் !

நன்றி : கமலாலயன்

புதிய புத்தகம் பேசுது - செப்டம்பர் 2011

ஒய்வற்ற நினைவலைகள் !

2011-11-28T01:02:00.000-08:00

( ' காக்கைச் சிறகினிலே ' நவம்பர் 2011 இலக்கிய மாத இதழில் வெளியான தி.க.சி.யின் கடிதம் )

' காக்கை ' முதல் இதழ் முழுவதையும் ஆர்வத்துடன் படித்தேன் ; சிறுகதைகள் , கட்டுரை , கவிதை , ஆய்வுரை , நூல் மதிப்புரை ஆகியன அனைத்துமே தரமாக உள்ளன . எனக்கு மனநிறைவு அளிக்கின்றன ; ' நினைவழியா நினைவுகள் : கவிஞர் புதுவை இரத்தினதுரை 'எனும் யதீந்திரா கட்டுரை, என்னை மிகவும் ஈர்த்தது . ' அந்த நாள் சிவத்தம்பி ' எனும் நெல்லை ந.கவுதமன் கட்டுரை , 1954 ஆம் ஆண்டு முதல் சிவத்தம்பியுடன் நெருங்கிய தோழமை பூண்ட ஒரு நெல்லைத் தமிழன் எனும் முறையில் , என்னை ஒய்வற்ற நினைவு அலைகளில் ஆழ்த்தியது ;

தோழர் தொ.மு.சி.ரகுநாதனும் நானும் , தோழர் நா.வானமாமலையும் , கலாநிதி க.கைலாசபதி, கலாநிதி கா.சிவத்தம்பி ஆகியோருடன், நெல்லையிலும் , சென்னையிலும் மார்க்சிய கலை இலக்கியத்தின் போக்குகள், வளர்ச்சி மற்றும் கடமைகள் குறித்துக் கலந்துரையாடிய இனிய நினைவுகளில் நெடுநேரம் ஆழ்ந்துவிட்டேன் . ' எழுத்தாலும் நினைவாலும் வாழும் உலகத்தமிழ்ப் பேரறிஞர் ' கா.சிவத்தம்பி என்பதில் , எள் அளவும் ஐயமில்லை .

நன்றி : காக்கைச் சிறகினிலே - நவம்பர் 2011

கணையாழி இடையறாது தொண்டாற்றட்டும் !

2011-11-25T02:01:00.000-08:00

( நவம்பர் 2011 கணையாழி இதழில் வெளியான தி.க.சி.யின் கடிதம்)

கணையாழி நேற்று வந்ததும் ஆவலுடன் படித்துக் கொண்டிருக்கிறேன் . கண்பார்வை மிகக் குறைவு என்ற போதிலும் படித்த வரையில், வெங்கட் சாமிநாதன் , அன்பாதவன் ஆகியோரின் நூல் மதிப்புரைகள், தமிழவன் , ஆர்.நடராஜன், இந்திரா பார்த்தசாரதி ஆகியோரின் கட்டுரைகள் , மலையாள எழுத்தாளர் சேதுமாதவன் நேர்காணல் ஆகியவை மிகவும் குறிப்பிடத்தக்கவை ; சிறுகதைகளில், ஜனநேசன் கதை - ' சூடாது கெடுத்த மாலை' என்னை மிகவும் ஈர்த்தது . கிரேஸி ( தமிழில் உதயசங்கர் ) கதையும் குறிப்பிடத்தக்கது . மொத்தத்தில் ' பாவமும் பாவிகளும் ' தமிழகத்தில் பெருகாதிருக்க , கணையாழி இடையறாது தொண்டாற்றட்டும் .

நன்றி : கணையாழி - நவம்பர் 2011

தீமையான போக்கு

2011-11-23T22:12:00.000-08:00

( 24.11.2011 தினமணி நாளிதழில் வெளியான தி.க.சி.யின் கடிதம் )

' அமெரிக்கா எவ்வழி , நாமும் அவ்வழி ' தலையங்கம் படித்தேன் . ஆபிரகாம் லிங்கன் வகுத்தளித்த உன்னத மக்களாட்சி நெறிமுறைகளுக்கு எதிராக , இன்றைய அமெரிக்க அரசு ஆணவத்துடன் செல்கிறது என்பதை உலக்குக்குப் பறைசாற்றும் பாங்கில் ' வால் ஸ்ட்ரீட் முற்றுகைப் போராட்டம் ' தொடர்கிறது என்பதை தினமணி தலையங்கம் நயமுடன் , இறுதி வரிகளில் சுட்டிக் காட்டுகிறது .

அது மட்டுமன்றி ' அமெரிக்காவுக்குப் பொருந்துவது , இந்தியாவுக்கும் பொருந்த வேண்டும் ' எனும் தவறான பாதையிலேயே ' பொருளாதார மேதை ' மன்மோகன் சிங் அரசின் கொள்கைகளும் நடைமுறையும் இருக்கின்றன என்பதை ' அமெரிக்கா எவ்வழி , நாமும் அவ்வழி ! ' எனும் தலையங்கத் தலைப்பும் , கிண்டலாக - ஆனால் உள்ளார்ந்த விரக்தியுடனும் வேதனையுடனும் எடுத்துரைக்கிறது . கடந்த 64 ஆண்டு வரலாற்று உண்மைகளைத் தொகுத்துப் பார்க்கும் போது , அதிலும் கடந்த 30 ஆண்டுகளில் நாட்டு நடப்பையும் நாடு எதிர்கொள்ளும் சிக்கலான பிரச்னைகளை எண்ணும் போது ' அமெரிக்க கார்ப்பரேட் வழி 'யைப் பின்பற்றும் மத்திய அரசின் போக்கு மிகவும் தீமையானது என்பது தெளிவு .

நன்றி : தினமணி நாளிதழ் - 24.11.2011

பெருமை சேர்க்காது

2011-11-22T22:47:00.000-08:00

( 21-11-2011 தினமணி நாளிதழில் வெளியான தி.க.சி.யின் கடிதம் )

அப்துல் கலாமுக்கு மக்கள் தொண்டனின் திறந்த மடல் ! என்ற தமிழ் உணர்வுமிக்க கட்டுரை படித்தேன் . அறிவியல் மாமேதை எனப் புகழப்படும் , முன்னாள் குடியரசுத் தலைவர் அப்துல் கலாம் , கூடங்குளம் அணுமின் நிலையப் பிரச்னையில் தமிழ்நாட்டு மக்களை ஏமாற்றுவதற்காகத் தில்லியில் சோனியா காந்தியின் வழிகாட்டலைச் சிரமேற்கொண்டு மன்மோகன் சிங் தலைமையில் இயங்கி வரும் மத்திய அரசின் மக்கள் விரோதக் கொள்கைகளுக்கும் நயவஞ்சகத் திட்டங்களுக்கும் கண்ணை மூடிக் கொண்டு வக்காலத்து வாங்கும் வக்கீல் ஆகிவிட்டார் என்ற வருந்தத்தக்க முடிவுக்கே வரவேண்டியுள்ளது . இது அறிவியல் மாமேதைக்குப் பெருமை சேர்க்கும் நிலைப்பாடு அல்ல .

தமிழ் மக்களின் நல உரிமைகளைப் பேணுதல் , அவர்களின் வாழ்வாதாரங்களைப் பாதுகாப்பதற்காகப் போராடுதல், உழைக்கும் மக்களின் அச்சங்களை முற்றிலும் அகற்றி , அவர்களின் சீரிய எதிர்காலத்துக்கு வழிகாட்டுதல் - இத்தகைய உன்னதப் பண்புகள் கலாமிடம் அருகிவிட்டன என்பது மிக மிக வருந்ததத்தக்கது ; துயரம் தருவது .

நன்றி : தினமணி நாளிதழ் - 12-11-2011

தமிழ் தேசியமும் சர்வதேசியமும் இணைய வேண்டும்

2011-11-22T22:45:00.000-08:00

( செப்டம்பர் 25, 2011 அன்று ஒசூரில் தமிழ்த் தேசிய பொதுவுடைமைக் கட்சியின் சார்பில் நடந்த தமிழினத் தற்காப்பு மாநாட்டில் , இலக்கியத்துறையில் சாதனை புரிந்தமைக்காக தி.க.சி .க்கு வாழ்நாள் சாதனையாளர் விருது வழங்கப்பட்டது . தி.க.சி சார்பில் இவ்விருதினை தோழர் அறிவரசன் பெற்றுக் கொண்டார் . இது குறித்து தமிழ்த் தேசிய பொதுவுடைமைக் கட்சியின் பொதுச் செயலாளர் தோழர்.பெ.மணியரசன் அவர்களுக்கு தி.க.சி எழுதிய கடிதம் )

அருமைத் தோழர் மணியரசன் அவர்களுக்கு ,

வணக்கம் . 8.1.0.11 சனிக்கிழமை மாலையில் , பேராசிரியர் அறிவரசன் என்னைச் சந்தித்தார் . தமிழினத் தற்காப்பு மாநாட்டில் தோழர் பா.செயப்பிரகாசம் தலைமையில் நிகழ்ந்த வாழ்நாள் சாதனையாளர் பாராட்டுக்களத்தில், இலக்கியத் துறையில் சாதனைக்காகத் தாங்களும் , தங்கள் இயக்கமும் எனக்கு வழங்கிய விருது , பரிசு மற்றும் பாராட்டுப் பொருட்களைத் தோழர் அறிவரசன் எனக்கு வழங்கினார்

மிகுந்த பெருமையுடனும் , தன்னடக்கத்துடனும் , பூரிப்புடனும் அவற்றை ஏற்றுக் கொண்டேன். உளம் மிக நெகிழ்ந்தேன் . அவ்வமயம், என் உணர்ச்சிகளைத் தெரிவிக்க , என்னிடம் சொற்கள் இல்லை. தங்களுக்கும் , தமிழ்த் தேசிய உரிமைகளுக்காக அயராது போராடும் தங்களது அமைப்புக்கும் , ஏட்டுக்கும் , செயற்குழுவினருக்கும் , ஆதரவாளர்களும் என் நெஞ்சம் நிறைந்த நன்றி ; தலை வாழ்ந்த வணக்கம் .

அக்டோபர் 1-15 தமிழர் கண்ணோட்டம் இதழ் பெற்றேன் . ' புதிய பாய்ச்சல் ! புதிய வீச்சு ! ' எனும் முகப்பு அட்டை முழக்கத்திற்கு ஏற்ப , தமிழர் கண்ணோட்டம் ஒவ்வொரு இதழும் , புதிய ஆயத்தங்களுடன் , புதிய புதிய படைப்பாளிகளின் பன்முகப் படைப்புகளுடன் வெளிவரும் என நம்புகிறேன் . புதியதொரு உலகம் செய்யத் தங்கள் இதழுடன் , எல்லாவகையிலும் ஒத்துழைப்பேன் ; தமிழ்த் தேசியமும் சர்வதேசியமும் இணைந்த விடுதலைப் பாதையில் மக்களை அணி திரட்டுவது, ஒன்றுபடுத்துவதே , இன்றைய நமது உடனடிக் கடமையாகும் .

என்றும் தோழமையுடன் .,

தி.க.சி

நன்றி : தமிழ்த் தேசியத் தமிழர் கண்ணோட்டம் - நவம்பர் 2011

கடித இலக்கியம்

2011-11-17T23:31:00.000-08:00

( பேராசிரியர் த.பழமலய் எழுதிய கடிதம் )

11-07-2011

அன்புள்ள தோழருக்கு ,

வணக்கம் . தோழர் தாவூத் அவர்கள் பேசினார் . உங்கள் உடல்நலம் குறித்து பேசினோம் . வயதான தோழர்கள் அவரவர்களுக்கு உரிய வசதிக் குறைவுகளோடு வாழ்ந்து வருகிறோம் . தாவூத் இன்ஷா அல்லா என்பார் . இயற்கையை எதிர்கொள்வது ஒன்று தானே இயலக் கூடியது . நலம் விழைகிறேன் .

தோழமையுடன்,

த.பழமலய்

அரசு இயந்திரத்தின் வன்முறை

2011-11-16T04:05:00.000-08:00

( காலச்சுவடு - நவம்பர் 2011 இதழில் வெளியான தி.க.சி.யின் கடிதம் )

அக்டோபர் காலச்சுவடின் ‘அரசு இயந்திரத்தின் வன்முறை’ வரவேற்கத்தக்க தலையங்கம். ‘இடதுசாரிகளின் முன்னுள்ள சவால்’ இவ்விதழின் முக்கியமான கட்டுரை. அதன் இறுதிவரிகள் மனத்தில் கொள்ள வேண்டியவை. தூய புரட்சிக்காகக் காத்திருப்பதைவிட இந்தப் போராட்டங்களைத் தங்கள் பக்கம்வென்று எடுப்பதே, இடதுசாரிகள் செய்யக்கூடியதாக இருக்கும். மக்கள் இயக்கங்களை நம்பியிருக்கும் இடதுசாரிகள் இந்த இயக்கத்தை எள்ளி நகையாடுவதும் அதைப் புறக்கணிப்பதும் கண்ணாடி வீட்டிற்குள்ளிருந்து கல்லெறிவதைப் போன்றதெனக் கட்டுரையாளர் கூறுவது நாட்டு நலனில் அக்கறையுள்ள வரலாற்று ஆய்வாளர்களால், மக்களால் ஏற்கத்தக்கதாகும்.

இடதுசாரிகளின் இன்றைய நிலவரம் என்னவெனில் இந்தியாவில் இடதுசாரிகள் தனிநபர்களாகவும் குழுக்களாகவும் கட்சிகளாகவும் இயக்கங்களாகவும் பல்வேறு நிறங்களில் நெடுங்காலமாகப் பிரிந்து கிடக்கின்றனர். இவர்களில் அருந்ததி ராய் ஒருவகை. பிரபாத் பட்நாயக், வேறு வகை. இருவரும் இருவேறு துருவங்கள். உதிரியான அறிவுஜீவி எழுத்தாளர், மக்கள் உரிமை ஆதரவாளர் ஆகிய முகங்கள் கொண்ட அருந்ததி ராய் தன்னிச்சையான போக்குகள் கொண்டவர். சமூக சேவகி மேதா பட்கரைப் போன்ற களப்போராளி அல்ல. மகா ஸ்வேதா தேவியைப் போலப் பழங்குடி மக்களின் போராட்டங்களைத் தமது படைப்புகளில் உன்னதமாகச் சித்திரிக்கும் கலைஞரும் அல்ல. பரபரப்புச் செய்திகளை ஊடகங்களின் தீனிப் பசிக்கு இரைபோடும் கசப்பான இடதுசாரி நையாண்டி விமர்சகர் அவர். ஆனால் பிரபாத் பட்நாயக் அப்படி அல்ல. தலை சிறந்த மார்க்சியப் பொருளாதார நிபுணர்; மார்க்சிஸ்ட் கம்யூனிஸ்டு கட்சியின் உயர்மட்டத் தலைவர்களில் ஒருவர்.

எனவே தேவைகளை, விமர்சனங்களிலுள்ள அடிப்படை நியாயங்களைக் கணக்கில் எடுத்துக்கொண்டு, சிபிஐ, சிபிஎம் மற்றுமுள்ள இடதுசாரிகளும் ஜனநாயக சக்திகளும் தம் முன்னுள்ள சவால்களை எதிர்கொண்டு, ஆக்கபூர்வமாகச் செயல்படுவர்கள் என நம்பலாம்!

நன்றி : காலச்சுவடு - நவம்பர் 2011

மரபில்லாமல் புதுமையில்லை !

2011-11-12T23:11:00.000-08:00

( தினமணி சுடர் - 11.07.1992 இதழில் வெளியான தி.க.சி.யின் பேட்டி )

? தங்களைப் பற்றியும், திறனாய்வுக்கலையில் தாங்கள் ஈடுபாடு கொள்ள உந்து சக்தியாக இருந்தவற்றைப் பற்றியும் கூறுங்கள் ?

நான் பிறந்தது திருநெல்வேலி. இவ்வாண்டு மார்ச் 30ல் எனக்கு அறுபத்தேழு வயது நிரம்பிவிட்டது. பணி ஒய்வுக்குப் பின் தற்போது திருநெல்வேலி வாசம்.

1947-48ல் என்று நினைக்கிறேன். தொ.மு.சி. ரகுநாதனின் 'இலக்கிய விமர்சனம்'என்ற நூலைப் படிக்கும் நல்ல வாய்ப்பு எனக்கு ஏற்பட்டது. மேலும் தமிழில் திறனாய்வுக் கலை புறக்கணிக்கப்பட்ட ஒன்றாகவும், வளர்ச்சி குன்றிய நிலையிலும் இருந்தது. இந்நிலையில் மக்களுக்குத் தரமான இலக்கியத்தை இனம் காட்டுதல், அறிமுகப்படுத்துதலான இக்கலையை நாமும் ஏன் செய்யக் கூடாது என்ற உந்துதல் என்னுள் ஏற்படலாயிற்று. மேலும் Clara Zetkin எழுதிய Lenin on Art and Culture போன்ற கட்டுரைகளும், மார்க்சீய அழகியல் பற்றிய சர்வதேசக் கண்ணோட்டமும் என்னைத் திறனாய்வுக் கலையில் ஈடுபடச் செய்தன. அதன் விளைவுதான் 'கிராம ஊழியன்' 'ஜனசக்தி' 'செம்மலர்' 'தாமரை', 'சாந்தி' 'சரஸ்வதி' முதலிய பத்திரிக்கைகளில் என் விமர்சனக் கட்டுரைகள் 1945 முதல் வெளிவந்து கொண்டிருக்கின்றன.

சுமார் பதினெட்டு வயதிலிருந்து எழுது ஆரம்பித்தேன். இந்த விமர்சனக் கட்டுரைகளைத் தொடக்க காலத்தில் என்னை எழுத ஊக்குவித்தவர் வல்லிக்கண்ணன் தான். பின்னர் பேராசிரியர் நா. வானமாமலை எனக்கு மிகவும் உதவினார். இருவருமே எனது ஆசான்கள்.

1941 – 42களில் 'இளந்தமிழன்' என்ற கையெழுத்துப் பத்திரிக்கையை நெல்லையில் ஆரம்பித்தோம். அதற்கு ஆசிரியர் வல்லிக்கண்ணன் தான். என் படைப்புகள் அதில் வெளிவந்தன. அவற்றுள் சில பிரசண்ட விகடனில் பிரசுரமாயின. நாரண துரைக்கண்ணன் அதன் ஆசிரியர். வல்லிக்கண்ணன், ரகுநாதன், கு. அழகிரி சாமி முதலிய பல எழுத்தாளர்களின் நாற்றங்காலாகப் 'பிரசண்ட விகடன்' விளங்கியது.

? உங்களது வாரிசான வண்ணதாசன் திறமைமிக்க இலக்கியப் படைப்பாளியாகத் திகழ்ந்து வருகிறார். அந்த ஆர்வத்துக்கு உங்களின் பங்களிப்பு என்ன? உங்களது அப்பாவிடமிருந்து உங்களுக்கு எத்தகைய உதவி கிடைத்தது ?

என் பையனுக்குப் படைப்புக் கலையில் எந்தவித உதவியையும் நான் செய்யவில்லை. மேலும் பணியின் நிமித்தமாக நான் குடும்பத்திலிருந்து பிரிந்து பல ஆண்டுகள் வாழவேண்டிய நிலை ஏற்பட்டது. என் வீட்டின் நூலகத்தில் நிறைய அரிய புத்தகங்கள், பத்திரிக்கைகளைச் சேகரித்து வைத்திருந்தேன். பாரதி, புதுமைப்பித்தன், டி.கே.சி., கவிமணி தேசிய விநாயகம் பிள்ளை, பாரதிதாசன், திரு.வி.க, காண்டேகர், சரச்சந்திரர், மகாத்மா காந்தி, ஜவஹர்லால் நேரு, சுபாஷ் சந்திரபோஸ், இன்னும் பிற பிரபலமானவர்களின் நூல்கள் இடம் பெற்றிருந்தன. இவற்றைப் படித்து வண்ணதாசன் தன்னை விருத்தி செய்யும் வாய்ப்பு ஒரளவு இருந்தது. ஒரு படைப்பாளியின் உருவாக்கத்திற்கு எத்தனையோ காரணங்கள் உள்ளன.

என் தகப்பனார் எனது ஏழு வயதில் காலமானார்.என்னுடைய இலக்கிய வளர்ச்சிக்கு என் அப்பாவிடமிருந்து எந்த உதவியும் பெற இயலவில்லை.

ஒரு படைப்பாளி உருவாதற்கு அவனது அழகியல் கண்ணோட்டம், வாழ்க்கை அனுபவம், கலா பூர்வமான உந்துதல், அவனது உழைப்பு, பயிற்சி , விடா முயற்சி முதலிய பல காரணங்கள் உள்ளன. வண்ணதாசன் என்ற கலைஞனின் வளர்ச்சிக்கு எத்தனையோ அக, புற காரணங்கள் உண்டு. வல்லிக்கண்ணனும் ஆரம்ப காலத்தில் அவனுக்கு வழிகாட்டியாக விளங்கினார் என்பது குறிப்பிடத்தக்கது.

? தற்காலச் சிறுகதைகள், குறு நாவல்கள் மற்றும் நாவல்கள் தமிழின் இலக்கிய வளர்ச்சிக்கு உதவுகின்றனவா ?

தமிழ் இலக்கியம் ஆல்போல் செழித்து, விழுதுகள் விட்டுப் பெருகிப்போன ஒன்று. தாங்கள் குறிப்பிட்டவற்றில் கலைத்தன்மை, அழகியல், உத்தி, நடை, குறிக்கோள் இவற்றை வைத்துத்தான் முடிவு செய்ய வேண்டும். தமிழ் இலக்கியத்திற்கு ஒரு தொன்மையான வரலாறு உண்டு. மரபும் உண்டு. அதே வேளையில், நூறு ஆண்டுகளுக்கும் மேலாக, மேலைய இலக்கியப் படைப்புகள், சிந்தனைகள் இவற்றின் தாக்கமும், செல்வாக்கும் உண்டு. பிறமொழி இலக்கியங்களின் தாக்கத்தால், தற்கால இலக்கியம் வளம் பெற்று வருகிறது என்பதையும் குறிப்பிட வேண்டும். மிகச் சிறந்த படைப்பாளிகள் எல்லா மாவட்டங்களிலும் உள்ளனர்.

? வணிக நோக்குடன் வெளியாகும் தமிழ் இதழ்கள் சமூக விழிப்புணர்வுக் கதைகளைப் பிரசுரிக்கின்றன. இது ஆரோக்கியமான வளர்ச்சியென நினைக்கலாமா ?

இக்கேள்வியை சிறிது மாற்றியமைத்துப் பதில் கூறுகிறேன். வணிக இலக்கியங்களை ஒதுக்கிவிட்டுப் பார்த்தால் பெரிய, நடுத்தர, சிறிய பத்திரிக்கைகள், சஞ்சிகைகளில் அவ்வவ்போது கலை நயமுள்ள படைப்புகள் வெளிவந்து இலக்கிய வளர்ச்சிக்கு உதவி வருகின்றன.

மக்கள் சிறுகதையை விரும்புகிறார்கள் என்பதைச் சந்தைப் பொருளாதாரத்தில் தேர்ந்துள்ள நமது பத்திரிக்கை நிறுவனங்கள் மிகத் தெளிவாக அறிந்துள்ளன. எனவே இங்குள்ள ஏடுகளில் ஜனரஞ்சக விற்பனைப் பண்டமாகச் சிறுகதை தயாரிக்கப்படுகிறது. பெருமளவில் விளம்பரங்களுடன் விற்பனை செய்யப்படுகிறது .ஏடுகளின் விருப்பங்களுக்கும், நிபந்தனைகளுக்கும் உள்பட்டு, வாசகர்களின் 'பருவநிலை'க் கேற்றவாறு 'சுவையான பண்டங்களைத் தயாரித்துச் சுறுசுறுப்பாக வழங்கும்' சிறுகதை உற்பத்தியாளர்களும் இங்கே ஏராளம் ஏராளம்! வெகு ஜன கலாசாரம் இங்கே கொடி கட்டிப்பறக்கிறது.

சமூக விழிப்புணர்வுக் கதைகள், கலை நயத்துடன், தரமான படைப்புகளாக ளங்க வேண்டும்; இவற்றை யார் பிரசுரித்தாலும் அது ஆரோக்கியமான வளர்ச்சி தான். அத்தகைய சூழ்நிலை, தமிழகத்தில் மேன்மேலும் வளர வேண்டும். அதற்கான முயற்சிகள் தொடர்ந்து மேற்கொள்ளப்பட வேண்டும்.

? இத்தகைய சூழலில் புதிய அணுகுமுறையுடன் கூடிய தரமான இலக்கியங்கள் ஏற்பட வாய்ப்பு உள்ளதா ?

கலையம்சம் நிறைந்த, பிரசார நெடி கலக்காத விழிப்புணர்வுக் கதைகளை எந்தப் பத்திரிக்கைகள் வெளியிட்டாலும் உன்னத குறிக்கோளுடன் நல்ல விதமாகச் செயல்பட வேண்டும். தரமான இலக்கியம் இவற்றால் நிச்சயம் வளரும்.

? திறனாய்வாளர்களின் விமர்சனங்கள் படைப்பாளிகளைப் பாதிப்படையச் செய்து, பின்னடைவு கொள்ளச் செய்கின்றன என்று ஒரு கருத்து நிலவுகிறதே. அதுபற்றித் தாங்கள் கூறுவது என்ன ?

நீங்கள் சொல்வது உண்மைதான். ஆனால் நடுநிலைமை, நிதானம், முரண்பாடின்மை ( Objectivity, Moderation , Consistency ) என்ற பண்புகளுடன் விமர்சனங்கள் வெளிவர வேண்டும். மேலும் எழுத்தாளன் தொட்டால் சுருங்கியாக இருப்பதும் நல்லதல்ல. தரமற்ற, மோசமான விமர்சனங்களை ஒதுக்கிவைக்கும் மனப்பக்குவம் வேண்டும். இம் மனப்பக்குவம் பின்னடைவுக்கு எதிரி . விமர்சனம் என்பது பொறுப்புணர்வுடன் செய்யப் பட வேண்டிய ஒரு பணி.

விமர்சனங்களில் பல வகை உண்டு. ரசனை விமர்சனம், பகுப்பாய்வு விமர்சனம், ஒப்பியல் விமர்சனம் என்பவை முக்கியமானவை. ரசனை விமர்சனம் விருப்பு வெறுப்பைச் சார்ந்தது; பகுப்பாய்வு விமர்சனம் அதை விடச் சிறந்தது. காரண காரியத்துடன் இணைந்தது. ஒப்பியல் விமர்சனம் ஆழமும், அகலமும் கொண்டது. இன்று மிகமிகத் தேவையானது.

? இலக்கியத் தரம் வாய்ந்த பத்திரிக்கைகள் அதிக விலையில் விற்கப்படுவதால் இலக்கிய ஆர்வலர்கள் வாங்கத் தயங்குகிறார்கள் என்று கூறப்படுகிறதே. அதைப் பற்றி உங்கள் கருத்து ?

உண்மைதான். ஆனால் இலக்கிய ஆர்வலர்கள் என்ன விலை வைத்தாலும் வாங்கக் கூடியவர்கள்தான் என்ற எண்ணம் வெளியீட்டாளர்களுக்கு இருப்பதுபோல் தெரிகிறது.விலைவாசிகள் மென்மேலும் உயர்ந்து வரும் இன்றைய சூழ்நிலையில் , மக்களின் வாங்கும் சக்தியைக் கணக்கில் எடுத்துக் கொண்டு பத்திரிக்கைகள், புத்தகங்கள் வெளிவந்தால் நல்லது. நல்ல நூல்களை விலைக்கு வாங்க முடியாவிட்டால், நூலகங்களில் படிக்கலாம், அல்லது நண்பர்களிடம் இரவல் வாங்கிப் படிக்கலாம் எப்படியும் அவற்றைப் படிக்க வேண்டியது அவசியம்.

? வணிக நோக்குடன் தமிழில் வருகின்ற வெகுஜனப்பத்திரிக்கைகளில் எழுதினால்தான் எழுத்தாளர்கள் பெயரும், புகழும், அங்கீகாரமும் பெறமுடியும் என்றும், சிற்றிதழ்களில் அது சாத்தியமில்லை என்றும் கருத்து நிலவுகிறதே உங்கள் கருத்து என்ன ?

படைப்பின் உருவம், உள்ளடக்கம், உத்திகள், மொழிநடை இவற்றுடன் படைப்பாளியின் வாழ்க்கைக் கண்ணோட்டம், கற்பனைவளம், படைப்பாற்றல், தனது படைப்பு வாயிலாக அவன் உணர்த்த முனையும் செய்தி, இவற்றின் சீரான ஒருங்கிணைவே ஒரு கலைப்படைப்பின் தரத்தை நிர்ணயிக்கின்றது.

எழுத்தாளனின் ஆத்மதிருப்திக்குப் பங்கம் ஏற்படாது, கலை இலக்கியத் தரத்தைச் சிதைக்காமல் படைப்புகள் வெளிவரவேண்டும். இன்று வணிக ஏடுகளைவிடச் சிற்றேடுகளில்தான், படைப்பாளிக்கு மனநிறைவு அளிக்கும் சூழ்நிலை நிலவுகிறது. ஒரு சில படைப்புகளை வெளியிட்டாலும், அவற்றைச் சிதைக்காமல் முழுமையாக வெளியிடுதல் என்ற கொள்கையை வெகுஜனப் பத்திரிக்கைகள் பின்பற்ற வேண்டும். இன்று இது மிக மிக அவசியம்.

? தமிழில் 'சர்குலேஷன்' குறைவாக உள்ள சிற்றிதழ்களில் எழுதாது வெகுஜன வணிகப் பத்திரிக்கைகளில் சில தரமான எழுத்தாளர்கள் எழுதுவது ஏன் ?

சிற்றிதழ்களில் எழுதுபவர்கள் தொண்டு மனப்பான்மையோடு தெரிந்துதான் இயங்குகின்றனர். அதாவது தரமான இலக்கிய வளர்ச்சிக்குத் தொண்டு செய்கிறோம் என்ற எண்ணத்துடன் எழுதுகின்றனர். வெகுஜனப் பத்திரிக்கைளின் குறிக்கோளுக்கும், நலன்களுக்கும் வளைந்து கொடுத்து, சுதர்மத்தை இழந்து விடாமல் இருப்பது படைப்பாளியின் நோக்கமாக இருக்க வேண்டும். ஆனால் எழுத்தையே முழுநேரத் தொழிலாகக் கொண்டவர்கள், பல்வேறு சிக்கல் மிகுந்த வாழ்க்கைச் சூழலில் படைக்க வேண்டிய நிலைக்குத் தள்ளப்பட்டிருக்கின்றனர். ஒரு புறத்தில் அன்றாட வாழ்க்கைத் தேவைகளைப் பூர்த்திசெய்தல், மறு புறத்தில் தமது படைப்பின் தரத்தைப் பேணுதல் - இரண்டையும் எப்படி வெற்றிகரமாகச் சமாளிப்பது என்ற கடுமையான பிரச்சினை பாரதி, புதுமைப்பித்தன், கு.ப.ரா., கு.அழகிரிசாமி முதலிய கலைஞர்களையும் வாட்டியிருக்கிறது. இன்றும் இது தீர்ந்தபாடில்லை. பொருளாதார வறுமையை விட, ஆன்மீக வறுமையே மிக இழிவானது, என்பது உண்மைக் கலைஞனின் இதய ஒலியாகும்.

? திறனாய்வாளர் க.நா.சு. ஒரு படைப்பைத் தமிழில் விமர்சிக்கும் பொழுது சிறப்பாகவும், அதே படைப்பை ஆங்கிலத்தில் விமர்சிக்கும் போது எதிர் மறையாகவும் சொன்னார் என்பர். ஒரே நூலுக்கு இரு வேறு திறனாய்வு செய்தார் என்ற கருத்து பாரபட்சத்தைத் தந்து விட்டதே ?

உண்மைதான். இது அடிப்படைப் பண்பிலிருந்து பிறழ்வதாகத்தான் நினைக்கத் தோன்றுகிறது. இந்நிலை ஒரு பண்பட்ட திறனாய்வாளருக்கு உகந்ததல்ல. நேர்மையைச் சந்தேகிக்கும் படியான நிலை ஏற்படுகிறது. இது சற்றும் விரும்பத்தக்கதல்ல. க.நா.சு. அமரர் ஆகிவிட்டார். இருப்பினும் இந்தக் கருத்தைச் சொல்வதன் நோக்கம் இத்தகைய திறனாய்வு வழி நல்லதல்ல என்று மற்றவர்கள் அறிந்து கொள்வதற்கே.

எந்தத் திறனாய்வாளனும், தமது கருத்தை மறுபரிசீலனை செய்யலாம்; முந்தைய முடிவை மாற்றிக் கொள்ளலாம். ஆனால், தமது கருத்து மாற்றத்திற்குரிய காரணங்களை, நேர்மையுடன் கூறிவிட வேண்டும். காலையில் ஒரு கருத்து, மாலையில் ஒரு கருத்து. தமிழில் ஒரு கருத்து, ஆங்கிலத்தில் ஒரு கருத்து என்ற போக்கு நகைப்பிற்கிடமானதாகும். அது மட்டுமல்ல, விமர்சனங்களின் நேர்மையைப் பிறர் சந்தேகிக்க இடம் அளிப்பதாகும். இது விரும்பத் தக்கதல்ல.

? மத்திய, மாநில அரசுகளின் தமிழ் இலக்கியப் பரிசுகள் தரமற்றவர்களுக்குப் போய்ச் சேருகின்றன என்ற கூற்று நெடுங்காலமாக நிலவுகிறதே, அதைப் பற்றித் தங்களின் கருத்து என்ன ?

கேள்வியைச் சிறிது மாற்றியிருந்தால் என் கருத்து சரியாக இருக்கும். அந்தந்தத் தேர்வுக் குழுக்களில் அங்கம் வகிப்பவர்களின் விருப்பு, வெறுப்பு இவற்றைப் பொருத்துத்தான் பரிசுகள் அமைகின்றன. ஆரம்பத்திலிருந்தே இந்நிலை நீடித்து வருகிறதென்று கேள்விப்படுகிறேன். கடுமையான விமர்சனங்களுக்குப் பின் இந்நிலை இப்பொழுது மாறிக்கொண்டுவருகிறது. தேர்வுக் குழுவினர் மதிப்பீடு தரமாக இருந்தால், தரமானவர்களுக்குப் பரிசு நிச்சயம் சென்றடையும்.

மத்திய, மாநிலப் பரிசுகளுக்குச் சில நெறிமுறைகள் வகுக்கப் பெற்றுள்ளன. அவை ஒழுங்காகப் பின்பற்றப்படுமானால், விளைவுகள் மன நிறைவளிப்பதாக இருக்கும் எந்தப் பரிசுத் திட்டத்திலும் நெறிமுறைகள் சீராகப் பின்பற்றப்பட வேண்டியது அவசியம்.

? அமரர் அகிலனுக்குப் பிறகு 'ஞானபீடப்' பரிசு தமிழில் யாருக்குமே இன்னும் தரப்பட வில்லையே ?

'ஞானபீடம்' பரிசுக்குத் தமிழில் தரமான படைப்பாளிகள் சிலர் இருக்கின்றளர். அவர்கள் தேர்வுக் குழுவினரால் கண்டறியப்பட வேண்டும். இது அவர்களது பொறுப்பு என்று மட்டும்தான் என்னால் கூறமுடியும். அண்மையில் வங்கக் கவிஞர் சுபாஷ் முகோபாத்யாயாவுக்கு 1991-ம் ஆண்டுக்கான ஞானபீடப்பரிசு (1971-85 கால கட்டத்திய அவரது படைப்புகளுக்காக) அறிவிக்கப்பெற்றுள்ளது. நான்காம் தடவையாக, வங்க மொழிக்குக் கிடைத்துள்ள ஞானப்பீடப் பரிசு இது. எழுபத்திரண்டு வயதான மிகச் சிறந்த படைப்பாளி, சுபாஷ் முகோபாத்யாயா. கவிதை, நாவல், பயண இலக்கியம், குழந்தை இலக்கியம், மொழி பெயர்ப்பு என்று பல துறைகளில் 46 நூல்கள் எழுதியவர். வங்காளிகளின் இலக்கிய உணர்வும், ஒற்றுமை உணர்வும் நம்மிடம் இல்லையே என்பதுதான் என் வருத்தம்.

? தரமான எழுத்தாளனின் படைப்பு எவ்வாறு அமைதல் வேண்டும் ?

நல்ல அடுத்த தலைமுறையினரை உருவாக்கும் வல்லமை பெற்றதாக அது அமைதல் வேண்டும்.

இத்தகைய நிலையை உருவாக்கிய மிகச் சிறந்த படைப்பாளிகள்தான் பாரதி, வ.ரா., புதுமைப்பித்தன், கு. அழகிரிசாமி. இவர்களைக் குறிப்பிடுவது எனக்குப் பெருமையாக இருக்கிறது. இவர்களது எழுத்துகளில் கலைநயமும், மனித நேயமும், சமுதாய நல நாட்டமும் ஊடும் பாவுமாக இணைந்து நிற்கின்றன.

இவர்களது எழுத்துக்களில் புதுமை, தனித்தன்மை முதலியவை மட்டுமின்றி புதுயுகத்தைப் படைப்பதற்கான தத்துவ தரிசனமும் உள்ளன.

? வட்டார வழக்குச் சொற்கள் தமிழ்ப் படைப்புகளில் வெளிவருவது இலக்கிய ஆர்வலர்களுக்கு மகிழ்ச்சியையும், பாமர வாசகனுக்குப் புரியாத நிலையையும் ஏற்படுத்தியுள்ளதே, இது பற்றி ?

ஆசிரியர் கூற்றாக ( Narration ) அவை வராமலிருப்பது நல்லது. பாத்திரங்கள் மூலம் வெளிப்படுவது தவிர்க்க இயலாது. பாரதி, புதுமைப்பித்தன் காலத்திலிருந்து இது வழங்கி வருவது அனைவரும் அறிந்ததே. தமிழ் உரை நடையில் ஆங்கில மூலச் சொற்கள் இடையிடையே விரவி வருவது தவிர்க்கப்பட வேண்டியது. ஆனால் வட்டார வழக்குச் சொற்கள் படைப்புகளில் வருவது படிப்பவருடைய மனநிலை, இலக்கியப் பயிற்சி ஆகியவற்றைப் பொருத்ததாகும். வட்டார வழக்குச் சொற்கள் படைப்புகளில் வருவது படிப்பவருடைய மனநிலை , இலக்கியப் பயிற்சி ஆகியவற்றைப் பொருத்ததாகும் . வட்டார வழக்குச் சொற்களை பத்திரிக்கைகள் மட்டுமின்றிப் பல்கலைகழகங்களும் ஏற்கும் நிலை உருவாகி வருகிறது. மொழி வளர்ச்சிக்குக் குந்தகமின்றி, எந்தெந்த வகையில் தமது படைப்புகளில் வழக்குச் சொற்களைப் பயன்படுத்த வேண்டும் என்பதை, ஆற்றலும், அனுபவமும் மிக்க ஒரு கலைஞன் அறிவான். (உதாரணம் : 'ஆசை முகம் மறந்து போச்சே - இதை யாரிடம் சொல்வேனடி தோழி' – பாரதி)

? நாடக இலக்கியம் தமிழில் நன்றாக வளரவில்லை என்ற ஆதங்கம் இருக்கிறதே. அது பற்றி ?

இதில் பத்திரிக்கைகள், பதிப்பகங்களின் பங்கு முக்கியமானது. ஓரங்க நாடகங்கள், முழு நீள நாடகங்கள் இவற்றை வெளியிட்டு, மக்களின் ஆர்வத்தையும், ரசனையையும் உயர்த்த அவை முன்வர வேண்டும். இப்போது 'வெளி' என்ற நாடக இதழ் இந்த அரும்பணியைச் செய்து வருகிறது.

கடந்த பதினைந்து ஆண்டுக் காலத்தில், தமிழ் நாடகத்துறையில் புது மலர்ச்சி ஏற்பட்டு வருகிறது. சென்னை, திருச்சி, மதுரை, புதுச்சேரி ஆகியவற்றில் மட்டுமின்றி, சிறிய நகரங்களிலும் நாடகக் குழுக்கள் இயங்குகின்றன. இவற்றின் நோக்கும் போக்கும் வித்தியாசமானவை. வீதி நாடகக் குழுக்களின் பணி குறிப்பிடத்தக்கது.

? சோவியத் செய்தித்துறை 'தாமரை' ஆகியவற்றில் பணியாற்றியிருக்கிறீர்கள். 'தீபம்' இதழில் நிறைய எழுதியிருக்கிறீர்கள். அந்த அனுபவங்களைச் சிறிது சொல்லுங்களேன் ?

எனக்கு எழுத்துத் துறையில் ஐம்பது வருஷங்கள் அனுபவம் உண்டு. பத்திரிக்கை ஆசிரியராக கால் நூற்றாண்டு அனுபவமும் அதில் அடக்கம். நான் சோவியத் செய்தித் துறை ஆசிரியர் குழுவில் பணியாற்றிக் கொண்டிருந்த போது ஒய்வு நேரத்தில் எனது ஒத்துழைப்பைப் படைப்புகளின் மூலமாகவும் செய்து வந்தேன். சுமார் நூறு 'தாமரை' இதழ்களில் பொறுப்பாசிரியராகவும், 1965 முதல் 1987 வரை 'தீபம்' இதழ்கள் வெளிவரவும் ஒத்துழைப்புத் தந்தேன். சோவியத் செய்தித் துறையில் மட்டும் ஆசிரியர் குழுவில் ஊதியம் பெற்று 25 ஆண்டுகள் (1965-1990) பணியாற்றினேன். அதன் பிறகு ஓய்வு பெற்றேன்.

? நீங்கள் படைத்த திறனாய்வுக் கட்டுரைகள் விமர்சனக் கடிதங்கள், வாசகர்களிடமும் படைப்பாளிகளிடமும் தாக்கங்களை ஏற்படுத்தி உள்ள நிலைகளை உணர்ந்துள்ளீர்களா ?

தாக்கங்களை உண்டு பண்ணியிருப்பதை நான் உணர்கிறேன். செவிவழித் செய்தியாகவும், வாசகர் மற்றும் படைப்பாளிகளிடமிருந்து வரும் கடிதங்கள், பேட்டிகளின் மூலமாகவும் நிதர்சனமாக என்னால் அறிய முடிகிறது.

? பணி ஓய்வுக்குப் பின் தங்களின் இலக்கியப் பணி பற்றித் தெரிந்து கொள்ளலாமா?

என் கட்டுரைத் தொகுதி ஒன்றை இவ்வருஷ முடிவுக்குள் சி.எல்.எஸ், வெளியிட இருக்கிறது. வேறு சில பதிப்பகங்களும் என் கட்டுரைத் தொகுப்புகளை வெளியிட இசைந்துள்ளன. அவற்றைத் தொகுத்தளிக்கும் பணியில், பற்பல நண்பர்களின் உதவியுடன் இப்போது ஈடுபட்டுள்ளேன்.

? தமிழில் வெளிவந்து கொண்டிருக்கும் அனைத்துப் படைப்புகளின் வளர்ச்சி கடந்த பத்தாண்டுகளில் பெருமை கொள்ளும் அளவுக்கு இருக்கிறதா ?

ஆம். மரபு, புதுக்கவிதை தேக்க நிலையிலுள்ளன. புதினம், சிறுகதை, பிற மொழிகளுக்கு நிகரான வளர்ச்சியடைந்துள்ளன. பலவித கருத்தோட்டங்கள் கொண்ட கட்டுரை நூல்கள், இலக்கியத் திறனாய்வும் வளர்ச்சி அடைந்துள்ளன. நாடக இலக்கியம் தேக்கம் தான். தமிழில் பல வகையான மொழிபெயர்ப்பு நூல்கள் வெளிவர வேண்டியது மிக அவசியம். தரமான சிறுவர் இலக்கிய நூல்கள், எளிய நடையில் அமைந்த விஞ்ஞான நூல்கள் இவையும் ஏராளமாகத் தேவை.

? வளர்ந்து வரும் எழுத்தாளர்களுக்கு என்ன சொல்ல விரும்புகிறீர்கள் ?

மரபில்லாமல் புதுமையில்லை. நமது தொன்மையான மரபின் சிறந்த அம்சங்களைச் சுவீகரித்துக் கொண்டு வரலாற்று உணர்வுடனும், உத்வேகத்துடன் புதுமைப் படைப்புகளைப் படைக்க முயற்சி செய்ய வேண்டும். இலக்கண அடிப்படை அறிவும் இருத்தல் வேண்டும்.மரபு நம் பூர்வீகச்சொத்து. தலைசிறந்த உலக இலக்கியங்களை மூலங்கள் அல்லது மொழி பெயர்ப்புகளின் வாயிலாகக் கற்று அறிந்து, இலக்கிய ஞானத்தைப் பெறுவது படைப்பாளியின் முக்கிய கடமை ஆகும். தனது படைப்புகள் தேசிய, சர்வதேசியத் தரத்துக்கு இணையாகத் திகழ வேண்டும் என்ற உன்னத லட்சியம், வளர்ந்து வரும் ஒவ்வொரு எழுத்தாளனுக்கும், நிச்சயம் இருக்க வேண்டும். அதற்கான விடாமுயற்சியும் கடின உழைப்பும் தேவை. படைப்புகளின் எண்ணிக்கைகளை விடத் தரத்தில்தான் அதிகக் கவனம் செலுத்த வேண்டும்.

உயர்ந்த படைப்பாற்றலும், தத்துவ நோக்கும். புதுமையும் தனித்தன்மையும் கொண்டவராக இருந்தால் தான் வெற்றி பெற முடியும். பொதுவாக வாழ்க்கையில் காணப்படும் யதார்த்த நிலைகளையும், பிரச்சினைகளையும் சித்தரிப்பதைத் தவிர அதை விமர்சனப்படுத்துவதாகவும் ஒரு படைப்பு அமைதல் வேண்டும்.

ஒரு படைப்பில் முக்கியமாக மூன்று அம்சங்கள் இருக்க வேண்டும்.

1.கலையழகு ( Artistic Beauty )

2.உலகளாவிய மனிதகுல நேயம் ( Universal Humanism )

3.சமூக நோக்கு ( Social Outlook )

பொதுவாக மகாகவி பாரதியின் லட்சியங்களான, சுதந்திரம்,சமத்துவம், சகோதரத்துவம் ஆகியவற்றில் ஒரு படைப்பாளி வேரூன்றி நிற்க வேண்டும். கலை சம்பந்தமான பொறுப்புணர்வும், சமுதாயப் பொறுப்புணர்வும் பின்னிப் பிணைந்த படைப்பாளியாகத் திகழ வேண்டும் என்பதே வளர்ந்து வரும் எழுத்தாளர்களின் லட்சியமாக இருக்க வேண்டும்

குரு ராதாகிருஷ்ணன்

தினமணி சுடர் - 11.07.1992

திராவிட இயக்க இலக்கியம் !

2011-10-30T07:34:00.000-07:00

( சங்கொலி - 21.09.2011 இதழில் வெளியான தி.க.சி.யின் பேட்டி )

? திராவிட இலக்கியம் பற்றி உங்கள் கருத்துகள் என்ன ?

தமிழ் , தமிழீழம் , அதிலிருந்து வந்த சொல் தான் திராவிடம் என நினைக்கிறேன் . இது பற்றி பல பேர் எழுதியிருக்கிறார்கள். மனோன்மணியம் சுந்தரனார் பிள்ளை தான் மொழி அடிப்படையில் திராவிட என்கிற கருத்தியலுக்கு வடிவம் கொடுத்தவர் . அந்தக் கருத்தியலை நடைமுறையில் ஒர் இயக்கம் எடுத்துக் கொண்டதால் அதனை திராவிட இலக்கியம் என்கிறோம் . கம்யூனிச இலக்கியம் , தேசிய இலக்கியம் என்பது போல ஒரு அடையாள குறி .

சிவசங்கரன்னு எனக்கு பெயர் இருக்கு . என்னை ஒரு நாயனார்ன்னு நினைத்துக் கொள்ள முடியாது . கடவுள் பக்தர்னு சொல்ல முடியாது . எனக்கு இடப்பட்டு இருக்கிற பெயர் . அது ஒரு அடையாளம் . திராவிட இலக்கியம் என்பது உண்மையில் தமிழ்த் தேசியத்தை வெளிப்படுத்தனவே.

பாவேந்தர் பாரதிதாசன் - தன்மானம் , பகுத்தறிவு , சமநீதி , தமிழ்ப்பற்று ஆகியவற்றை வலியுறுத்தக் கூடிய இயக்கத்தில் இருந்ததினால் அவரது பாடல்கள் தமிழ் இயக்கத்திற்கு உதவியாக இருந்தது . தமிழ் இனம் என்பது தனது மொழி உரிமையுடனும் சுயமரியாதையுடனும் வாழ வேண்டும் என்கிற அவர் படைப்புகள் அவர் சார்ந்த இயக்கத்தின் கொள்கைகளை எதிரொலித்தது . அவையெல்லாம் தமிழ்த் தேசியத்தின் வெளிப்பாடுகளாகவே இருந்தன. நெடுஞ்செழியன் மாதிரி அந்தக் காலத்தில் இருந்தவர்கள் எல்லாம் இலக்கியத்தை எழுதியும் பேசியும் வளர்த்திருக்கிறார்கள் . அதற்குப் பாரதிதாசன் பாடல்களைப் பயன்படுத்திக் கொண்டிருக்கிறார்கள் .

' வாழிய செந்தமிழ் வாழ்க நற்றமிழர் வாழிய பாரத மணித்திரு நாடு ' என்று பாரதியார் பாடினார் . இதிலே இந்தியத்தோடு இணைந்த தமிழ் தேசியம் தெரிகிறது . பாரதிதாசன் சுயமரியாதை இயக்கத்தைச் சேர்ந்தவர் . நாத்திகக் கொள்கை உடையவர் . தமிழ் மீது அளவு கடந்த பற்று கொண்டவர் . அதனால் ' எங்கள் வாழ்வும் , வளமும் மங்காத தமிழென்று சங்கே முழங்கு ' 'தமிழுக்கு அமுதென்று பேர் அந்த தமிழ் இன்பத்தமிழ் எங்கள் உயிருக்கு நேர் ' என்று பாடினார் . பாடியதோடு மட்டுமில்லை .

இந்தியை ஒழிக என்றார். அப்போது எது வாழணும்னு சொன்ன போது தமிழ் வாழ்கன்னு சொன்னாங்க . தமிழ் மட்டும் வாழணும்னு பாரதிதாசன் சொல்லவில்லை . பகுத்தறிவு வாழணும்னு சொல்லியிருக்கிறார் . சுயமரியாதை பற்றி பாடியிருக்கிறார் . பெரியார் இயக்கம் வளர்வதற்கு கொள்கை ஒரு அம்சமாக இருந்திருக்கிறது . பொதுவா, திராவிட அரசியல் இயக்கத்தின் அடிப்படை மொழி சார்ந்து இருக்கு . அதனாலே தமிழ்த் தேசியத்தின் தனித்தன்மை அதில் தெரியுது .

பொதுவுடைமை பற்றி பாரதிதாசன் நிறைய பாடியிருக்கிறார் . அதில் முக்கியமா உலகப்பன் பாட்டு என் மனத்திலேயே நிற்கிறது . வெறும் தமிழ், தமிழ்ன்னு சொல்லவில்லை . பொதுவுடைமை கொள்கையையும் சேர்த்து தான் சொல்லியிருக்கிறார்கள் . அதனால் தான் திராவிட இயக்கம் அன்றைக்கு இளைஞர்களை ஈர்த்தது .

செயப்பிரகாசம் அதிலிருந்து வந்தவர் தான் . மீரா, நா.காமராசன் இப்படிப் பல கவிஞர்கள் , எழுத்தாளர்கள் அதிலிருந்து வந்தவர்கள் தான் . சொல்லிக் கொண்டே போனால் அது மாபெரும் பட்டியல் . எல்லோருடைய உள்ளத்திலும் தமிழ் வாழணும் , பொதுவுடைமை, சமதர்மம் வளரணும் என்பது தான் இருந்தது . பகுத்தறிவு , தன்மானம் , சமதர்மம் , இவை தான் பெரியாரின் உயிர்கொள்கையாக இருந்தது . சிங்காரவேலர் போன்றவர்களும் அதை வலியுறுத்தினார்கள் .

ஒரு காலகட்டத்திற்குப் பிறகு 1962 இல் திராவிடப் பிரிவினையை அண்ணா கைவிட்டப் பிறகு அது தமிழ்த் தேசியமாக மலர்ந்தது . பொதுவாக திராவிட இயக்கத்தின் கொள்கை தமிழ், பொதுவுடைமை தான் . அதிலிருந்து வந்தவர்கள் பின்பு ஒருநாளும் மார்க்சியத்தை எதிர்க்கவேயில்லை . சில பேர் வழி தவறி போயிருக்கலாமே தவிர , மற்றவர்கள் எல்லோரும் விஞ்ஞான சோசலிசத்துடன் இருக்க வேண்டும், நாத்திக சோசலிசத்துடன் இருக்க வேண்டும் , பகுத்தறிவு பான்மையில் இருக்க வேண்டும் என்று நினைத்தார்கள்

பின்பு ஒரு காலக்கட்டத்தில் வானம்பாடி இயக்கம் தோன்றியவுடனே சிலர் இதையும் தாண்டி பொதுவுடைமை கொள்கைக்கு வந்துவிட்டார்கள். school லிருந்து college போவது போல வந்தார்கள்ன்னு சொல்லலாம் . இதை வந்து சட்டை உரிப்பு என்று வைத்துக் கொள்ளலாம் . இது ஒரு வளர்ச்சி .

திராவிடர் கழகம் , திராவிட முன்னேற்ற கழகம் , மறுமலர்ச்சி திராவிட முன்னேற்ற கழகம் என்று வந்தாலும் அடிப்படை என்பது தமிழ் தேசியம் தான் . தமிழ் உலக அளவில் வெளிவர வேண்டும் . பயிற்று மொழியாகவும் , நீதிமன்ற மொழியாகவும் இருக்க வேண்டும் என்று தான் இன்றைக்கு இருக்கக்கூடிய வானம்பாடி கவிஞர்கள் ( தமிழ் தேசிய இடதுசாரி ) கருத்துடையவர்கள் . நாம் வெறும் தமிழ் , தமிழ் என்று சொல்லிக் கொண்டு இருப்பதை விட பொருளாதார கொள்கை மாற்றத்தைக் கொண்டு வர வேண்டும் . அதற்கு சோசலிசம் தேவை . அதற்காக சோவியத்தினுடைய நண்பர்களாக மாறி , சீனாவின் நண்பர்களாக மாறி மார்க்சியத்தை படித்தனர் . தமிழ் தேசிய எழுத்தாளர்களுடைய சாரம்சம் என்பது அவர்கள் பெரியாரிசத்தையும் ஆதரிக்கிறார்கள் , மார்க்சியத்தையும் ஆதரிக்கிறார்கள் . தமிழ் தேசியம் என்பதற்கு ஒரு வரைவிலக்கணம் சொல்ல வேண்டும் என்றால் பெரியாரியம் , மார்க்சியம் இரண்டும் பிணைந்ததாகும் . இதுவே திராவிட இயக்க இலக்கியத்தின் உயிர்ப்பாகும் .

? ஜீவா கூட திராவிட இயக்கதிலிருந்து வந்தவர் தானே ?

ஜீவா திராவிட இயக்கத்திலிருந்து வந்தவர் தான் . சுயமரியாதை இயக்கத்திலிருந்து 1936, 37 களில் அகில இந்திய கட்சி வேண்டும் என்ற நோக்கில் , அதாவது இதை விட பெரிய குளத்தில் நீந்த வேண்டும் என்ற அடிப்படையில் சர்வ தேசியத்தில் இணைந்தார் .

மீரா மாதிரி, இன்குலாப் மாதிரி , கவிஞர்களுக்கு தமிழ் தேசியம் மட்டும் போதாது . சர்வ தேசியம் வேண்டும் என அந்தப் பாதையில் சென்றார்கள் . அவர்களின் ஒரு கண் தமிழ் என்று சொன்னால் , இன்னொரு கண் பொதுவுடைமை .

திராவிட இலக்கியத்தில் பாரதிதாசன் , அண்ணா , கலைஞர் கருணாநதி போன்ற அனைவரும் கருத்து வலியுறுத்தலை முக்கியமாகக் கொண்டிருந்தார்கள் . கலை என்பது மக்களை சென்றடைய வேண்டுமானால் கருத்தை வலியுறுத்த வேண்டும் என்று அவர்கள் சொன்னார்கள்.

அண்ணா அவர்கள் கதை எழுதியிருக்கிறார் . நாடகம் எழுதியிருக்கிறார் . திரைப்பட வசனமெழுதி இருக்கிறார் . அது போலவே கலைஞர் கருணாநதியும் எழுதியிருக்கிறார் . இப்படி திராவிட இயக்கத்தில் பலர் எழுதியிருக்கிறார்கள் . 1947, 48 இல் வாணன் என்றொருவர் ரஷ்ய இலக்கியம் பற்றி புத்தகம் எழுதி இருக்கிறார் . அன்றைக்கு கம்யூனிஸ்ட் கட்சி அடக்குமுறை காலகட்டத்தில் இருந்தது . சேலம் சிறையில் தோழர்கள் இருந்த காலத்தில் திராவிட இயக்கம் தான் ஆதரவாக இருந்தது .

திராவிட எழுத்தாளர்கள் என்று சொல்லும் போது பொதுவுடைமை எழுத்தாளர்கள் செய்யாத இரண்டு காரியத்தை அவர்கள் செய்தார்கள் . ஒன்று, நாடகத்துறை . இரண்டு , திரைப்படம் . இதில் நாடகத்துறையில் எனக்குப் பிடித்தது , நான் ரொம்ப ரசித்தது , எம்.ஆர்.ராதாவினுடைய நாடகங்கள் . அவர் தான் பெரியாருடைய கருத்துக்களை மக்களிடம் எடுத்துச் சொல்லக் கூடியவராகத் திகழ்ந்தார் . கம்யூனிஸ்ட் இயக்கத்திற்காகவும் 1957,58 இல் அவர் பிரச்சாரத்திற்காக போனார் . எம்.ஆர்.ராதாவின் நாடகம் மூடநம்பிக்கைகளை எதிர்க்கக் கூடியது . சுயமரியாதையை வற்புறுத்தக் கூடியது . சாதி , மதம் போன்ற மடமை , முட்டாள்தனங்களை எதிர்க்கக் கூடியது . அது அறிவொளி இயக்கமாக , பகுத்தறிவு பிரச்சாரமாக எதிரொலித்தது.

இதைப் பற்றி தீபத்தில் நான் கொடுத்த பேட்டியிலும் சொல்லியிருந்தேன் . எம்.ஆர்.ராதா நாடகம் என்பது கிண்டல், நையாண்டி ஆகியவற்றால் மக்களை சிரிக்க வைத்ததுடன் சிந்திக்கவும் வைத்தது . யாராவது அவர் எத்தனை நாடகங்கள் செய்திருக்கிறார் என்பது பற்றி பி.ஹெச்.டி பண்ணியிருக்கிறார்களா என்று தெரியவில்லை . பெரியார் இயக்கத்தின் வளர்ச்சியில் எம்.ஆர்.ராதாவின் நாடகம் முக்கிய பங்கு வகிக்கிறது.

அண்ணா - ஒர் இரவு , வேலைக்காரி போன்ற நாடகங்களை வேறொரு பாணியில் , மேல்நாட்டு தொனியில் எழுதினார். எம்.ஆர்.ராதா, கே.ஆர்.ராமசாமி, டி.வி.நாராயணசாமி போன்றவர்களும் , நாடக கலைக்கு நிறைய செய்திருக்கிறார்கள் . பொதுவுடைமை கட்சிக்கு இது போல செய்ய வழியில்லை . அதற்கான ஆட்களும் இல்லை .

ஒர் இரவு , வேலைக்காரி நாடகங்கை திருச்சி தேவர் ஹாலில் போட்டு கல்கியைப் பார்க்கச் சொன்னார்கள். நாடகத்தில் உள்ள கருத்துச் செறிவுகளைப் பார்த்து அண்ணாவை தமிழகத்து பெர்னாட்ஷா எனக் கல்கி பாராட்டினார் . எம்.ஆர்.ராதா நாடகங்களில் பார்ப்பனக் குத்தல்கள் இருக்கும் . ரசிக்கும்படியாக குத்தல்கள் இருக்கும் . அறிஞர் அண்ணா கொள்கைகளால் அடிப்பவர் . பார்ப்பனியம் எனப்படும் பூசாரித்தன்மையை பணத்தோட்டம் , ஆரியமாயை , சிவாஜி கண்ட இந்துராஜ்ஜியம் போன்ற நாடகங்களில் சொல்லியிருப்பார் . அண்ணாவினுடைய நாடகங்களில் புதுமை , தனித்தன்மை, கலையழகு , இயக்கக் கொள்கைகள் இருந்தன.

திராவிட முன்னேற்றக் கழகம் ஆரம்பிக்கப்பட்ட போது, நிறைய பத்திரிக்கைகள் இருந்தன. திராவிட நாடு , மன்றம் , தென்றல் , முரசொலி ( நாளிதழ் அல்ல ) முல்லை , முத்தாரம் என நூற்றுக்கணக்கான இதழ்களில் அந்த இயக்கத்தின் இலக்கிய வடிவங்கள் அச்சேறின . அண்ணாவின் எழுத்துக்கு தனி மரியாதை இருந்தது . கே.ஆர்.ராமசாமி போன்றவர்களால் நாடக கம்பெனிகளுக்கு வேலை கொடுக்க வேண்டியிருந்தது . அதனால் தொடர்ந்து நாடகங்களை எழுதினார். நாடகங்களின் வெற்றியைப் பார்த்தவுடன் ஏ.வி.மெய்யப்பச் செட்டியார் அவற்றை திரைப்படமாக எடுக்கத் தொடங்கினார் . மக்கள் மத்தியில் நல்ல ரசனை இருந்தது . ஏகப்பட்ட கூட்டம் வந்தது. திரைப்படமாக எடுத்தால் நமக்கும் ஔடும் . புதிய விஷயத்தைக் கொடுத்த மாதிரியும் இருக்கும் என ஏ.வி.எம் முயற்சி பண்ணினார். நீலகண்டன் மாதிரியான ஆள்கள் சொல்லி வேலைக்காரி , ஒர் இரவு நாடகங்களை திரைப்படமாக எடுத்தனர்.

? எழுத்தைப் பொறுத்தவரை ?

எழுத்தைப் பொறுத்தவரையில் அண்ணாவின் கட்டுரைகள் மிகச் சிறந்ததாச்சே ! சிந்தனைக் களஞ்சியம் தான் . அவர்கள் எழுத்துக்கள் என்றுமே கொள்கை வலியுறுத்தல்களாக , கருத்து வலியுறுத்தல்களாகத் தான் இருக்கும் . அழகான தமிழில் நன்றாக படிக்கும் படி கட்டுரை இலக்கியத்தை வளர்த்தார்கள் . அதே மாதிரி மேடை இலக்கியம் , நாடகம் , திரைப்படத்தை வளர்த்தார்கள் . இது தான் அவர்களின் contribution.

கவிதையில் பாரதிதாசனுக்குப் பிறகு யாரும் அந்தளவுக்குப் போக முடியவில்லை . வாணிதாசன் , முடியரசன் மற்ற கவிஞர்களெல்லாம் வந்தாலும் அவர்களால் அந்தளவுக்கு போக முடியவில்லை . பாரதிதாசனை இமிடேஷன் பண்ணினார்கள் . பாரதிதாசனின் நகலாக தான் இருந்தார்களே தவிர அவரை மீற முடியவில்லை . அண்ணா ஒரு பத்திரிக்கை ஆசிரியர் . மேடைப் பேச்சாளர் .மேடைப் பேச்சை ஒரு கலையாகவே வளர்த்தார்.

தமிழ் ஒளி என்பவர் திராவிட இயக்கத்திலிருந்து மார்க்சிய இயக்கத்தால் கவரப்பட்டவர் . திராவிட இயக்கம் என்பது மிகக் குறுகிய அளவில் இருக்கிறது . பார்வை போதாது என்று சொல்லி விட்டு சோவியத் அனுதாபியாக மாறியவர்.

நாம் திராவிட இயக்கத்தின் பழைய பங்களிப்பைப் தான் சொல்ல முடியுமே தவிர , இப்போது திராவிட இலக்கியம் என்று நாம் பிரித்துப் பேச முடியாது . அந்த இலக்கியத்திற்கு ஒரு வரலாறு இருக்கிறது . எல்லாம் தமிழ்த் தேசியம் என்ற கடலில் சங்கமமாகிவிட்டது .

முக்கியமாகச் சொல்ல வேண்டியது என்னவென்றால், சன் டி.வி வந்துவிட்டது. எல்லாமே கேலியில் கலந்து விட்டது . திராவிட இலக்கியம் என்ற பெயர் இன்றைக்குப் பொருந்தாத பெயராகி விட்டது . பூகோள அமைப்பில் மொழி வழித் தேசியத் தன்மைகள் மாறிவிட்டன. ஆனால் தமிழ்த் தேசியம் உயிருடன் இருக்கிறது . என்னைப் போன்ற ஒவ்வொரு பொதுவுடைமைவாதியும் தமிழ்த் தேசியவாதி தான் . தமிழ் தான் எங்களுக்கு உயிர்.

நான் முதலில் ஒரு தமிழன். அதன் பின் ஒரு இந்தியன் . பிறகு சர்வதேசியவாதி . பாரதிதாசன் வார்த்தையில் சொன்னால் உலகப்பன் . தாய்மொழி முன்னேறாமல் எதுவும் முன்னேறாது . நான் ஆரம்பத்திலிருந்து பொதுவுடைமைவாதியாக இருக்கிறேன் . ஏன் திராவிட இயக்கத்தில் இடம்பெறவில்லையென்று சொன்னால் , நாங்கள் நாட்டுப் பிரிவினையை விரும்பவில்லை . ஆனால் உள்ளத்தால் தமிழர்கள் தான்.

திராவிட இலக்கியத்தின் பங்களிப்பு என்பது அண்ணா, பாரதிதாசன், டிகே.சீனிவாசன் , இராதாமணாளன் , நெடுஞ்செழியன் , வாணன் , செழியன் , கருணாநிதி என நிறைய இருக்கிறது . சில பேர் இதை குறைத்து மதிப்பிடுகிறார்கள் . அவர்களின் படைப்பில் கருத்து வலியுறுத்தல் இருந்தது . பத்திரிக்கையிலும், திரைப்படத்துறையிலும் சாதனையாளர்களாக இருந்தார்கள் .

அ.நா.பாலகிருஷ்ணன் -

நன்றி : சங்கொலி - 21.09.2001

கடித இலக்கியம்

2011-10-22T03:21:00.000-07:00

( தீப.நடராஜன் எழுதிய கடிதம் )

தென்காசி

31-08-2011

அன்புள்ள நண்பர் உயர்திரு.தி.க.சி. அவர்களுக்கு,

வணக்கம் . தாத்தா பிறந்தநாள் விழா சிறப்பாக நடந்தது .

இந்த ஆண்டு கூட்டம் சிறிது குறைவு தான் . எனினும் பேசியவர்கள் ஈடுபாட்டுடன் பேசினார்கள் என்று தான் சொல்ல வேண்டும் .

நமது கழனியூரன் ஒருங்கிணைப்பாளராக கவிதை நடையில் தொகுளித்ததும் சுவையாக அமைந்திருந்தது .

டி.கே.சி.யின் நினைவும் , அவர்களது தாக்கமும் பரவலாகிக் கொண்டு வருகிறது என்பது எனக்கு நிறைவைத் தருகிறது .

நான் ஒரு தோட்டக்காரன் . எல்லாச் செடிகளுக்கும் நீர் பாய்ச்சுவேன் . மலர்கிறது மலரட்டும் - மலராததைப் பற்றிக் கவலைப்படுவானேன் - என்று நீங்கள் சொல்லுகிறீர்கள் .

தாத்தா பாராட்டிப் பாராட்டிப் பலரை ஊக்குவித்தார்களே !

அதே போல் இலக்கியத்தில் தோய்ந்து தம்முடைய சொந்தக் கவலைகளை மறக்கவும் அவர்களால் முடிந்திருக்கிறது .

நீங்களும் அவ்விரு காரணங்களால் அவர்களை ஒத்த விதத்தில் வாழ்ந்தும் , பிறரை வளர்த்தும் வருகிறீர்கள் .

உங்கள் மனம் திறந்த கடிதம் எனக்குக் கிடைத்த ஒப்பற்ற பரிசு.

திரு.வே.முத்துக்குமார், வல்லிக்கண்ணன் கடிதங்களும் , தங்கள் நேர்முகங்களின் தொகுப்பும் நூலாக வரப் போகும் நல்ல சேதி சொன்னார் . ரொம்ப சந்தோஷமாக இருக்கிறது.

திருமதி.சுபாஷிணி தங்களைச் சந்தித்த மகிழ்ச்சியை சொல்லிச் சொல்லி மாய்கிறார்.

உடல்நிலையை நன்கு கவனித்துக் கொள்ள வேண்டுகிறேன் .

மனநிலையைப் பற்றிக் கவலை இல்லை . உற்சாகத்திற்கு குறைவில்லை . வேறு என்ன வேண்டும்.

அன்பன்

தீப.நடராஜன்

வல்லிக்கண்ணன் நினைவாக !

2011-10-22T02:57:00.000-07:00

தமிழிலக்கியத்தில் சீரிய வரலாறு படைத்த இலக்கியச் சிற்பி வல்லிக்கண்ணன் அவர்களோடு 65 ஆண்டுகள் உடன்பிறவாச் சகோதராய் விளங்கிய தி.க.சி அவர்களைப் புதுகைத் தென்றல் இதழுக்காகச் சந்தித்தேன் . உடல்நிலை குன்றிய நிலையிலும் ' வல்லிக்கண்ணன் நினைவாக ' என்று கூறியவுடன் மனமுவந்து சொன்ன கருத்துக்கள் .

? 86 வயது வரை வாழ்ந்து சுமார் எழுபது ஆண்டுகளுக்கு மேலாக இலக்கிய வாழ்வில் பயணித்து தவம் போல எழுத்தை நேசித்த இலக்கிய ஞானி வல்லிக்கண்ணன் அவர்களின் முக்கியத்துவம் பற்றி தாங்கள் என்ன கருதுகிறீர்கள் ?

இலக்கியச் சிற்பி என்றும் இலக்கிய ஞானி என்றும் போற்றப்படும் வல்லிக்கண்ணனின் சாதனைகள் பன்முகமானவை . சிறுகதை, நாவல் , கவிதை , கட்டுரை , நாடகம் , இலக்கியத் திறனாய்வு, மொழிபெயர்ப்பு , வாழ்க்கை வரலாறு முதலிய பல துறைகளில் மூன்று தலைமுறைகளாய் இயங்கி வந்துள்ளார் .

மகாகவி பாரதி , புரட்சிக்கவிஞர் பாரதிதாசன் இவர்களின் வழியில் தமது வாழ்நாள் முழுவதும் தடம் தவறாமல் மிக்க உறுதியுடன் அவர் பயணம் செய்தார் . வறுமை, பசி, இனப் புறக்கணிப்பு கண்டனங்கள் அவதூறுகள் இவை எவையும் அவரை இலட்சியப் பாதையிலிருந்து விலகச் செய்ததில்லை . சுருங்கச் சொன்னால் பணம் , பதவி , பட்டம் எவற்றுக்கும் ஆசைப்படாத வாழ்வையே அவர் மேற்கொண்டிருந்தார் .

தமிழில் மறுமலர்ச்சி இயக்கத்தை வளர்ப்பதற்காக தாம் மேற்கொண்டிருந்த அரசுப் பணியையும் உதறி எறிந்து திருமணமும் செய்து கொள்ளாமல் எழுத்துலகில் இலக்கியத் தவம்புரிந்த தியாகி அவர் .

' நமக்குத் தொழில் கவிதை , நாட்டிற்குழைத்தல் இமைபொழுதும் சோராதிருத்தல் ' என்னும் பாரதியின் இலட்சியத்தை தம் கடைசி உயிர்மூச்சு உள்ள வரையிலும் அவர் பின்பற்றினார் . நாட்டுப்பற்று , மொழிப்பற்று , இனப்பற்று , இவை அவரின் ஆளுமையின் முக்கியக் கூறுகளக்கும் . இப்பண்புகள் அவரது படைப்புகள் அனைத்திலும் கலை அழகுடன் பிரதிபலித்தன .

' எங்கள் வாழ்வும் எங்கள் வளமும் மங்காத தமிழென்று சங்கே முழங்கு ' என்னும் புரட்சிக்கவி பாரதிதாசனின் கொள்கை வழியிலும் மிக்க உறுதியுடன் படைப்புகளை வழங்கினார். 60 நூல்களுக்கும் மேலான அவரது படைப்புக் களத்தில் எந்த இடத்திலும் அவர் தன்னை விற்றுக் கொள்ளவில்லை . சுயமரியாதை , பகுத்தறிவு, அறிவு நாணயம் , அப்பழுக்கற்ற நேர்மை , ஒப்புயர்வற்ற மனித நேயம் இவற்றின் அடையாளமே வல்லிக்கண்ணன் .

' எல்லாம் மனிதனுக்காக ; மனித குலத்தின் மேம்பாட்டுக்காக ' என்பதே அவரின் உயிர் நாடியான கொள்கை . சுதந்திரம் , சமத்துவம் , சகோதரத்துவம் எனும் கொள்கையை அவரது வாழ்விலும் எழுத்துகளிலும் நாம் பார்க்கக் காணலாம் . அவர் வாழ்வின் மிக முக்கிய அம்சங்களுள் ஒன்று இளம் எழுத்தாளர்களையும் , சிற்றிதழ்களையும் சீராக இனங்கண்டு தமது இலக்கியப் பாதையில் அவர்களுக்கு உதவியும் ஒத்துழைப்பும் வழங்கி ஊக்குவித்தலே ஆகும் .

இன்றைய காலக்கட்டத்தில் தமிழ் எழுத்தாளர்கள் எத்தனை சதவீதம் பேர் வ.க.வின் இந்த வழியைப் பின்பற்றுகின்றனர் என்பதை நினைக்கின்ற போது மிக்க வருத்தமாகவும் கவலையாகவும் இருக்கிறது .

' காசே தான் கடவுளடா, கடவுளுக்கும் தெரியுமடா ' எனும் நுகர்வுக் கலாச்சாரப் பாதையில் இன்றைய உலகம் வெகு வேகமாகச் சுழன்று கொண்டிருக்கிறது . இதனால் வாழ்க்கையின் எல்லா அம்சங்களுமே சீர்க்குலைவுக்கும் பண்பாட்டுச் சீரழிவுக்கும் பல்வேறு வீழ்ச்சிகளுக்கும் உள்ளாகின்றன . இது இன்றைய இளைஞர் உலகினையும் குறிப்பாக இளம் எழுத்தாளர்களையும் பாதிக்கின்றது .

வணிகக் கலாச்சாரப் பிடியிலிருந்து இளம் எழுத்தாளர்களையும் , படைப்பாளிகளையும் மீட்பதற்கு என்ன வழி என்று எப்போதும் சிந்தித்தார் வல்லிக்கண்ணன். இந்த இலக்கினை அடைய சிற்றிதழ்களே ஏற்ற கருவிகள் என்றும் அவர் கருதினார் . எனவே வணிக இதழ்களின் வளர்ச்சிக்குத் தம் நேரத்தைச் செலவிடாமல் குறிக்கோளில் தலைசிறந்த சிற்றிதழ்களையும் இளம் இலக்கியவாதிகளையும் இனங்கண்டு பேணி வளர்ப்பதில் பேரார்வம் கொண்டு இடையறாது செயல் புரிந்தார் .

இன்றைய காலக்கட்டத்தில் இவரைப் போன்றோரின் தொகை அருகிவிட்டதே எனவும் நான் வருந்துகிறேன் . இன்று அவர் இருந்தால் புதுகைத் தென்றல் போன்ற தரமான இதழ்களுக்கு எல்லா வகையிலும் தன்னலமின்றித் தொடர்ந்து பணிபுரிவார் . இதுவே இன்றையச் சூழ்நிலையில் வல்லிக்கண்ணன் போன்ற கலை இலக்கியவாதிகளின் முக்கியத்துவமும் தேவையும் ஆகும் '

ஒவியர் பொன் வள்ளிநாயகம்

நன்றி : புதுகைத் தென்றல் - நவம்பர் 2010

நெக்ஸ்ட் பெஸ்ட்

2011-10-21T01:31:00.000-07:00

( ம.தி.மு.க. மேடையில் தி.க.சி )

நெல்லை மாநகராட்சிக்கான ம.தி.முக வேட்பாளரை அறிமுகப்படுத்தும் கூட்டத்தில் , பிரபல இலக்கிய விமர்சகரும் , சாகித்ய அகாடமி விருது பெற்றவருமான தி.க.சிவசங்கரன் மேடை ஏறினார். மார்க்சிய சிந்தனையாளரான தி.க.சி எப்படி அந்த மேடையில் ஏறினார்.

மதி,முக தேர்தல் பணிக்குழுச் செயலாளர் குட்டி என்கிற சண்முக சிதம்பரத்திடம் பேசினோம் .

ஊழலற்ற உள்ளாட்சி அமைப்புகள் இருந்தால் தான் அடித்தட்டு மக்கள் வரையிலும் அரசின் நலத்திட்டங்களைக் கொண்டு போக முடியும் என்பதில் வைகோ உறுதியாக இருக்கிறார் . எங்கள் வேட்பாளரை ஜெயிக்க வைத்தால் , ஒய்வு பெற்ற அதிகாரிகள் கொண்ட குழுவை அமைத்து அவர்களின் ஆலோசனைப்படி மேயர் செயல்படுவார் . சுகாதாரத்தை மேம்படுத்த டாக்டர்கள் குழு, மாநகராட்சிப் பள்ளிகளின் கல்வித்தரத்தைச் சீர்படுத்த ஒய்வு பெற்ற பேராசிரியர்கள் , ஆசிரியர்கள் கொண்ட குழு அமைப்போம் . இதனை மக்களுக்குப் புரிய வைப்பதற்காகவே , பாளையங்கோட்டையில் நடந்த வேட்பாளர் அறிமுகக் கூட்டத்துக்கு சேவியர் கல்லூரியின் ஒய்வு பெற்ற பேராசிரியர் பெனடிக்ட் தலைமை வகித்தார் . அதே போல் டவுணில் நடந்த கூட்டத்துக்கு இலக்கியவாதியான தி..க.சி..யை மேடையில் ஏற்றினோம்’ என்றார் உற்சாகத்துடன் .

தி.க.சிவசங்கரனிடம் கேட்டதற்கு , ‘ வை.கோ எனக்கு 25 ஆண்டுகால நண்பர் என்பதாலும் இது எம்.பி அல்லது எம்.எல்.ஏ தேர்தல் கிடையாது என்பதாலும் அரசியல் மேடை ஏறினேன் . எனக்கு வேட்பாளர் மகேஸ்வரியை நன்கு தெரியும் . அதோடு, கம்யூனிஸ்ட் கட்சிகள் இங்கே மேயர் தேர்தலில் போட்டியிடவில்லை . ஆகவே தான் , ' நெக்ஸ்ட் பெஸ்ட் ' என்ற முறையில் ம.தி.மு.க.வுக்கு ஆதரவு கொடுத்தேன் . தமிழர்களின் வாழ்வாதாரப் பிரச்னை ஏற்படும் போது எல்லம் குரல் கொடுப்பவர் வை.கோ. முருகன் , சாந்தன் , பேரறிவாளனின் தூக்கு தண்டனையை ரத்து செய்ய வேண்டும் என்பதற்காக வழக்கறிஞர் ராம்ஜெத்மலானியை கூட்டி வந்து அவர் மேற்கொண்ட முயற்சிகள் பாராட்டுக்கு உரியவை ‘ என்றார்.

ம.தி,முக.வின் மேயர் வேட்பாளரான மகேஸ்வரி நடராஜனை ஆதரித்து வரலாற்று ஆய்வாளரும் தமிழ் அறிஞருமான தொ.பரமசிவனும் வீடு வீடாகச் சென்று வாக்கு கேட்டு வருகிறார்.

-ஆண்டனிராஜ்

நன்றி : ஜுனியர் விகடன் - 16.10.2011

கடித இலக்கியம்

2011-10-21T01:26:00.000-07:00

( நாவலாசிரியர் கி.ரா எழுதிய கடிதம் )

புதுவை - 8

18-09-2011

பிரியமுள்ள தி.க.சி. அவர்களுக்கு,

உங்கள் வாழ்த்துக் கடிதம் வந்தது .

மகிழ்ந்தோம் .

விழா சிறப்பாக - நண்பர்கள் , அன்பர்கள் , விசிறிகள் என்று - நடந்தேறியது . தீப.நடராஜன் வந்திருந்தது இன்னொரு விசேடம் .

நேற்றோடு விழாச்சொக்கு முடிந்து இன்று கொஞ்சம் தெளிவாய் இருக்கிறேன் .

இந்தப் புத்தகத்தை வரீசெயாக உடையவர்களுக்கு அனுப்பணும் . உட்கார்ந்ததும் , முதல் புத்தகம் உங்களுக்குத் தான் .

தொகுப்பு என்பதில் கழனியூரான் பெயரையும் சேர்க்கச் சொல்லியிருந்தேன் . வேணுமென்றே தவிர்க்கப்பட்டிருக்கிறது . ஒருத்தருக்கொருத்தர் ஆகாமல் போகட்டும் என்று செய்யும் செயல் இது .

***

இப்படி ஒரு புத்தகம் வர காலதாமதம் செய்தது ஒரு கொடுமை .

சரி ; எப்படியோ வந்த்து விட்டது.

அந்த மட்டில் சரி.

கி.ரா

கடித இலக்கியம்

2011-09-28T04:18:00.000-07:00

( திருமதி.தினகரி சொக்கலிங்கம் ( புதுமைப்பித்தன் மகள் ) எழுதிய கடிதம் )

மதிப்பிற்குரிய ஐயா அவர்களுக்கு ,

வணக்கம் . தாங்கள் சென்னை வந்திருந்த போது தங்களை வீட்டிற்கு அழைத்து வர வேண்டும் என ஆவலோடு இருந்தோம் . தங்களின் முகவரி கேட்டு வள்ளியை தொடர்பு கொண்ட போது தான் அந்த துயரச் செய்தியைக் கேட்டோம் .. கணபதி அண்ணாச்சியின் திடீர் மறைவு எந்த அளவிற்கு தங்களைப் பாதித்திருக்கும் என எண்ணி எண்ணி துயரப்பட்டோம் . தங்களை நேரில் காண வரலாம் என்று நினைத்த போது தற்போது தொந்தரவு செய்ய வேண்டாம் , நெல்லை வந்த பின் கடிதம் எழுதுங்கள் என வள்ளி கூறிய யோசனையும் சரியென்றே பட்டது . என்ன சொல்லி என்ன ? இழப்பும் பிரிவும் ஈடு செய்ய முடியாத ஒன்றல்லவா !

எப்படி தங்களுக்கு இது பற்றி கடிதம் எழுதுவது என்ற தயக்கம் ... பயம் . எல்லாம் தெரிந்தவர்கள் நீங்கள் . வயதும் அனுபவமும் உங்கள் வாழ்க்கைப் பயணத்தில் உங்களை வழி நடத்திச் செல்லும் போது என்ன வார்த்தைகளால் உங்களை ஆற்றுப் படுத்துவது .

சென்ற ஏப்ரலில் அப்பாவின் பிறந்த நாளன்று உங்களை சந்தித்து மீண்டதை மனது அசைபோடுகிறது . உங்களின் கடல் படு மணல் படித்து நிறைய தெரிந்து கொண்டோம் . அந்த மண்ணின் சிறு துகளாகவாவது இருக்க மாட்டோமா என்று தான் மனசு ஏங்குகிறது . அப்பாவின் பாசம் அறியாமலேயே வளர்ந்து விட்ட எனக்கு தங்களைப் போன்றோரை பார்க்கும் போது உங்களிடம் உரையாடி மீள்கிற போது மகிழ்வாக இருக்கிறது .

தங்களின் எழுத்துலக வாரிசாக - உங்களின் காலடித் தடத்தில் - பாதம் பதிக்க கல்யாணி ...

பு.பிக்கோ ... ? புதுமைப்பித்தனுக்கு ஒத்தைக்கு ஒரு பிள்ளை ... அதுவும் சொத்தை என்பது போல நானும் ... !

நெல்லை வருகையில் தங்களை சந்திக்கிறோம் .

அன்பு மகள்

தினகரி சொக்கலிங்கம்